सडक आन्दोलनका विषयमा रास्वपाभित्र अन्तरविराेध, राेक्नुपर्ने पक्षमा सुमनालगायत यी नेताहरु

काठमाडौं । सभापित रवि लामिछाने पक्राउ परेपछि राष्ट्रिय स्वतन्त्र पार्टी (रास्वपा) ले अघि बढाएकाे सडक आन्दाेलनलाई निरन्तरता दिने विषयमा पार्टीभित्र अन्तरविराेध देखिएकाे छ । आन्दोलनले पार्टीलाई ब्याकफायर गर्ने भन्दै केही नेताहरूले असन्तुष्टि जनाउन थालेका छन् ।

रास्वपाले दोस्रो चरणको आन्दोलन यही ८ गतेबाट गर्ने घोषणा गरिसकेकाे छ । तर, आन्दोलनको मोडालिटी अहिलेसम्म टुंग्याउन सकेको छैन । हिजो उपसभापति डिपी अर्यालले बालाजुस्थित पार्टी केन्द्रीय कार्यालय आकस्मिक केन्द्रीय समितिको बैठक राखेका थिए ।आकस्मिक बैठकमा सबै केन्द्रीय सदस्यहरू आउन नपाएपछि जुममार्फत् पनि जोडिएको थियो । आन्दोलनको विषयमा निस्कर्षमा पुग्न नसकेपछि आज दिउँसो ३ बजे बैठक बस्नेगरी वैठक स्थगित गरिएको छ।

वैठकमा सहमहामन्त्री सुमना श्रेष्ठले आन्दाेलन स्थगित गर्नुपर्ने धारणा राखिन् । आन्दाेलनले कुनै पनि नतिजा ननिस्किएकाे भन्दै उनले सडकमा आउने भए जनसराेकारका अरु मुद्दा अघि सार्नुपर्नेमा जाेड दिएकी थिइन् ।

जुमबाट जाेडिएका केन्द्रीय सदस्य गणेश कार्कीले आन्दाेलन गर्ने निर्णय पार्टीकाे निर्णय गलत भएकाे बताए । पार्टीकाे नीति र विचारसँग आन्दाेलनकाे तादाम्यता नमिलेकाे उनकाे विचार छ ।

केन्द्रीय सदस्य तथा सांसद असिम शाहले पनि आन्दाेलनप्रति असन्तुष्टि जनाएको एक नेताले बताए । न्यायालय प्रभावित पार्दैनौँ भन्ने तर सभापति लामिछानेलाई अदालतमा उपस्थित गराउने दिनमा आन्दोलन गर्दा जनतामा राम्रो सन्देश नजाने उनकाे धारणा छ।

शाहको भनाइलाई उद्धृत गर्दै ती नेताले भने, ‘हामी न्यायालय प्रभावित पार्दैनौँ पनि भन्छौँ। तर, अदालतबाहिर आन्दोलन गर्छौँ  । यसले जनतामा कस्तो सन्देश जान्छ ? अब सभापतिलाई काठमाडौं ल्याउने कुरा हुँदै छ, हामी काठमाडौं केन्द्रित आन्दोलन गर्ने भन्छौँ । त्यसले काठमाडौंबासीमा कस्तो सन्देश जान्छ ?’

यसैगरि डा. प्रभात अधिकारी र खुस्बुसरकार श्रेष्ठले पनि आन्दोलनको विपक्षमा धारणा राखे ।

रास्वपामा उपसभापति डिपी अर्याल, महामन्त्री कवीन्द्र बुर्लाकोटी, सहमहामन्त्री विपीनकुमार आचार्यलगायत नेताहरू आन्दोलन चर्काउने पक्षमा छन् । त्यसाे त सभापति रवि लामिछानेले हिरासतबाटै आन्दाेलन चर्काउने सन्देश पठाइरहेकाे स्राेतकाे दावी छ ।

पार्टीमा आन्दोलनको विषयमा मतभेद भएपछि उपसभापति अर्यालले सभापति लामिछानेसँग परामर्श लिएर थप कार्यक्रमको रणनीति बनाउने तयारी गरेका छन् । आजको बैठकबाट आन्दोलनबारे पार्टीभित्र समान धारणा बनाउने तयारी छ ।

सहमहामन्त्री सुमना श्रेष्ठले आन्दोलनको विषयमा पार्टीमा छलफल चलिरहेको बताइन् । उनले भनिन्, ‘आन्दोलनको विषयमा हिजोबाट छलफल सुरु भएर स्थगित भएको थियो, आज पनि बस्दैछ। आन्दोलनसहित पार्टीले आजको बैठकले आवश्यक निर्णय गर्छ ।’

उनका अनुसार बैठक दिउँसो ३ बजे बस्दैछ ।

उनले सहकारीको मुद्दामा राजनीतिकरण भएको बताइन् । सरकारले सहकारी पीडितसँग गरेको सम्झौता बिर्सिएको कारणले पीडितहरूले आजबाट फेरि काठमाडौं केन्द्रित आन्दोलनमा उत्रिन बाध्य भएको बताइन् ।

पार्टीभित्र आन्दोलनको विषयमा मतभेद हुँदैगर्दा गतसाता पार्टीका उपसभापतिद्वय अर्याल र स्वर्णिम वाग्ले, प्रवक्ता मनिष झाले सभापति लामिछानेलाई पोखरा हिरासतमा सामूहिक भेट गरेका थिए ।

भेटमा सभापति लामिछानेले सरकारले आफूमाथि प्रतिशोध राखेको पुष्टि हुँदै गएको भन्दै आन्दोलनबारे जनतालाई बुझाउन निर्देशन दिएका थिए ।

रास्वपाले सभापति लामिछानेलाई हिरासत बाहिर राखेर अनुसन्धानको माग गर्दै सडकमा उत्रिएपछि आन्दोलन प्रभावकारी बनाउन सकेको छैन ।