काठमाडौंमा इजरायलविरुद्ध प्रदर्शन गरिँदै

काठमाडौं । प्यालिस्टिनीमाथि इजरायली आक्रमणको विरोध गर्दै काठमाडौंमा शनिवार प्रदर्शन गरिने भएको छ ।

नेकपा (माओवादी केन्द्र), एकीकृत समाजवादी, जनमोर्चा, जसपा नेपाल, नेकपासहितका दलद्वारा गठित ‘प्यालिस्टिनीमाथि इजरायली जनसंहारबिरुद्ध संयुक्त अभियान, नेपाल’ ले उक्त प्रदर्शनको आयोजना गर्न लागेको हो ।

दिउँसो १ बजेदेखि माइतीघर मण्डलामा सुरु हुने उक्त प्रदर्शनलाई पाँचै दलका शीर्ष नेताले सम्बोधन गर्ने एकीकृत समाजवादीका उपमहासचिव रामकुमार भट्टराईले बताए ।

प्रदर्शनमा कम्तीमा पाँच हजार जनशक्ति उतार्ने गरी तयारी गरिएको भट्टराईले बताए । त्यसका निम्ति प्लेकार्डमा लेखिने नारा पनि तय गरिएको उनले बताए ।

‘इजरायली विस्तारवाद– मुर्दावाद’, ‘अमेरिकी साम्राज्यवाद–मुर्दावाद, अमेरिका–इजरायल मिल्दैछन् । प्यालेस्टाइन क्वप्लाक्कै निल्दैछन्’, ‘यो सत्य थाहा छैन, भन्छ को ? प्यालेस्टाइन प्यालिस्टिनीको मातृभूमि हो !’ सहितका नारा तय भएको छ ।

प्रदर्शनमा प्रस्तुत गरिने अन्य नारामा ‘शक्तिशाली बलशाली भन्दैमा अरूको देश टुक्र्याउन पाइँदैन !’, ‘स्थानीय बासिन्दा खेदेर अर्को देश बनाउन पाइँदैन !’, ‘गाजामा प्रतिघण्टा १५ प्यालेस्टिनी अनाहकमा मर्दैछ हेर विश्व समुदाय, ऊ कहाँ छ, के गर्दैछ ?’ रहेका छन् ।