‘ह्रस्वदीर्घ’ दोस्रो हप्तामा, निता भन्छिन्- हामी पूर्णरुपमा ‘सेफ’ भइसक्यौँ

काठमाडौं । अभिनेत्री निता ढुंगानाले निर्माण गरेको चलचित्र ह्रस्वदीर्घ आजबाट दोस्रो हप्तामा प्रवेश गरेको छ । महँगो बजेटमा बनेको चलचित्रले लगानी सुरक्षित गरिसकेको दाबी निताले गरेकी छन् ।

पहिलो हप्तामा चलचित्रले ५ करोडभन्दा बढीको ग्रस कलेक्सन गरेको निर्माण पक्षले जनाएको छ । यो चलचित्र ६ करोडको लागतमा निर्माण भएको हो ।

हलहरूको कलेक्सन हेर्दा लगानी उठाउन अझै लामो यात्रा गर्नुपर्ने देखिन्छ । तर, निताले चलचित्रबाट आफूहरू पूर्णरुपमा सुरक्षित भइसकेको बताएकी छन् ।

सामाजिक सञ्जालमा स्टाटस लेख्दै निताले भारतमा ओटीटी प्लेटफर्मममा चलचित्र विक्री गरिएको जानकारी दिएकी छन् । साथै, केही समयपछि भारतका हलहरूमा पनि रिलिज गर्ने र ओभरसिजको योजना पनि बनिरहेको उनको भनाइ छ ।

‘केही ठाउँमा हामी बक्स अफिस गर्दैछौं भने केही ठाउँमा सोल्ड आउट नै भइसकेको छ । र, पूर्णरुपमा हामी सेभ भइसकेका छौँ,’ निताले लेखेकी छन् ।

दर्शकहरूले आफूप्रति देखाएको माया र चिन्ताप्रति उनले आभार प्रकट गरेकी छन् ।

‘जति नै मान्छेले खुट्टा तान्ने कोसिस गरे पनि, जति नै अगाडि बढ्न नदिए पनि, मेरो दर्शकहरूले हामीलाई हात समातेर अगाडि बढाइदिनुभयो, हामीलाई भेट्दाखेरि अँगालो मारेर रुने, नानी तिमीलाई धेरै नराम्रो गरिरहेको छन् मान्छेले, किन यस्तो गरिरहेको छन् भनेर मनमा भएको कुरा भन्ने, बुढाबुढी आमाबुवा भेटेँ, भाइबहिनीहरू भेटेँ, हाम्रो चलचित्रको लागि रुने, मेरो लागि रुने, मैले भगवान् जस्तो दर्शक कहाँ भेटुँला र ?’ निताले लेखेकी छन् ।