कालिकोटबाट टिकापुर जाँदै गरेको बस सिस्नेमा दुर्घटना

सुर्खेत । कर्णाली राजमार्ग अन्तर्गत दैलेखको आठबिस नगरपालिका–२ सिस्नेमा शुक्रबार बेलुका बस दुर्घटना हुँदा ८ जना घाइते भएका छन् । कालिकोटबाट टिकापुरतर्फ जाँदै गरेको ना ४ ख ६०५६ नम्बरको बस अनियन्त्रित भई सडकको भित्तामा ठोक्किँदा चालकसहित ८ जना मध्यम घाइते भएका हुन् ।

घाइतेलाई तत्काल उपचारका लागि साङतेडामस्थित स्थानीय मेडिकलमा पठाइएको छ भने अन्य २० जना सामान्य घाइतेलाई पनि उपचारका लागि व्यवस्था गरिएको इलाका प्रहरी कार्यालय राकम कर्णालीले जनाएको छ ।

दुर्घटनापछि घटनास्थलमा प्रहरी नायब निरीक्षक सूर्य कार्कीको नेतृत्वमा र प्रहरी चौकी पाल्तडाबाट प्रहरी सहायक निरीक्षक श्याम थापाको नेतृत्वमा प्रहरी टोली परिचालन गरिएको छ ।

बस दुर्घटनाको कारण र घाइतेहरूको नामावली संकलन गर्ने कार्य जारी रहेको प्रहरीले जनाएको छ ।