सुदुरपश्चिम यात्रामा राजेन्द्र लिङ्देन- देश बचाउने र बनाउने योजना लिएर आएका छौं, साथ दिनुस्

काठमाडौं । राष्ट्रिय प्रजातन्त्र पार्टी (राप्रपा)ले मंसिर ३ गते बाजुराबाट थालेको सुदुरपश्चिम यात्रा कैलाली पुगेर टुंग्याएको छ। अध्यक्ष राजेन्द्र लिङ्देनको नेतृत्वमा भएको यात्राको क्रममा सुदरपश्चिमका पाँच जिल्लामा राप्रपाले आमसभा गरेको थियो।

बाजुरा, अछाम, डोटी, कञ्चनपुरका हजारौँ जनतासँग प्रत्यक्ष संवाद गर्दै कैलालीको साँढेपानीमा पुगेर यात्रा सम्पन्न गरेको अध्यक्ष लिङ्देनले बताए।

उनले यात्राको क्रममा पार्टीप्रति जनताको विश्वास बढेको भन्दै अन्य पार्टीका नेता कार्यकर्ता पनि पार्टी प्रवेश गरेको बताए। कैलालीमा भएको अन्तिम सभालाई सम्बोधन गर्दै लिङ्देनले देशलाई सही बाटोमा लैजाने कामको नेतृत्व राप्रपाले मात्रै गर्नसक्ने जिकिर गरे।

उनले भने, ‘अब देश बचाउनको लागि यो पुरानो नेतृत्व र व्यवस्थालाई विस्तापित गर्न हामी तयार हुनुपर्छ। हाम्रो देश मात्रै नबन्ने होइन। धेरै लामो समय लाग्दैन। इमान्दार नेतृत्व हुने हो भने १० वर्षभित्र देशले मुहार फेरिसक्छ।’

देशमा गलत नेतृत्वकै कारण अहिलेसम्म विकास हुन सकेको जिकिर गर्दै कृषि, विजुली, पर्यटन, सूचना प्रविधिको विकास गर्न सकिएमा विकासले फड्को मार्न सक्ने सुनाए।

उनले अभिभावकीय भूमिकामा राजा र जनताले प्रत्यक्ष निर्वाचित गर्ने कार्यकारी प्रमुख हुनुपर्ने व्यवस्थाको माग गरे।

उनले भने, ‘सबै जनताको भोट चाहिने भएपछि प्रधानमन्त्री आफैं उत्तरदायी हुनुपर्छ। प्रधानमन्त्रीले सबै जिल्लाको सबै जनताको बारेमा सोच्छन्, देशप्रति उत्तरदायि प्रधानमन्त्री बनाउनको लागि प्रत्यक्ष निर्वाचित कार्यकारी प्रधानमन्त्री हुनुपर्छ।’

उनले प्रदेश कटौती गरेर जनप्रतिनिधिको संख्या घटाउनुपर्ने बताए। उनले आफूहरुले देश बचाउने र बनाउने योजना लिएर आएको भएकाले सबै जनतालाई साथ दिन आह्वान गरे।यसअघि कर्णांली प्रदेशको यात्रा गरेपछि उत्साहित भएर राप्रपाले सुदुरपश्चिम यात्रा गरेको हो।