क्षेत्रपाटी निःशुल्क चिकित्सालयलाई चीनद्वारा विद्युतीय सवारीसाधन प्रदान

काठमाडौं । चीन सरकारले काठमाडौंको क्षेत्रपाटीमा रहेको क्षेत्रपाटी निःशुल्क चिकित्सालयलाई विद्युतीय सवारीसाधन उपहार दिएको छ ।

शनिबार नेपालका लागि चिनियाँ राजदूत छन सोङले एक कार्यक्रमबीच विद्युतीय सवारीसाधन चिकित्सालयलाई हस्तान्तरण गरेका हुन् । विद्युतीय सवारी हस्तान्तरण गर्दै राजदूत सोङले चीन र नेपालको सम्बन्ध थप सुदृढ बनाउन चीन प्रतिबद्ध रहेको बताए ।

कार्यक्रममा उपप्रधान तथा शहरी विकासमन्त्री प्रकाशमान सिंहले विश्वमै चर्चाको विषय बनेको कार्बन डाइअक्साइड कम उत्सर्जन गर्न विद्युतीय गाडीहरुको ठूलो भूमिका रहेको उल्लेख गर्दै सहयोगका लागि चीन सरकारलाई धन्यवाद दिए ।

उनले चिकित्सालयलाई अगाडि बढाउन निरन्तर सहयोगहरु आइरहेको उल्लेख गर्दै चिकित्सालयले टोलवासीलाई मात्र नभई काठमाडौं जिल्लाभर सेवा विस्तार गर्नुपर्ने बताए ।

उनले नागरिकको सेवामा प्रभावकारी भएर लाग्न चिकित्सालयका प्रतिनिधिहरुलाई निर्देशनसमेत दिए ।

उनले विसं. २०१३ सालमा समान्य उपचारबाट शुरु गरिएको चिकित्सालय आजको दिनसम्म आइपुग्दा अस्पतालको रुपमा विकास हुनु खुशीको कुरा भएको बताए ।