पूर्वमन्त्री लीलाबल्लभ अधिकारीविरुद्ध मुद्दा नचलाउने सरकारी वकिलकाे निर्णय

विराटनगर । कोशी प्रदेशका पूर्वमन्त्री एवं एमाले सांसद लीलाबल्लभ अधिकारीविरुद्ध मुद्दा नचलाउने निर्णय सरकारी वकिलको कार्यालयले गरेको छ ।

सरकारी वकिल कार्यालय काठमाडौंका जिल्ला न्यायाधिवक्ता सीताराम अर्यालका अनुसार प्रदेश सांसद अधिकारीविरुद्ध मुद्दा नचलाउने निर्णय भएको हो ।

अधिकारीबाहेक मानव तस्करी प्रकरणमा जोडिएका अन्य ११ जनाविरुद्ध भने जिल्ला अदालत काठमाडौंमा मुद्दा दर्ता भएको छ । सो प्रकरणमा तीन जना फरार छन् ।

अधिकारी कोशी प्रदेश सरकारको आन्तरिक मामिला तथा कानूनमन्त्री रहेकै बेला जापानमा हुने एक्सेस टु होम कल्चर २०२४ को सात दिने कार्यक्रममा भाग लिन कात्तिक ११ गते जापान गएका थिए । कार्यक्रममा लैजाने चाँजोपाँजो मिलाएकाले उनीसहित जनक राई, दावा शेर्पा र कञ्चन देवकोटालाई जापान पठाएपछि अधिकारीकै सूचनाका आधारमा जापानको अध्यागमनले डिपोर्ट गरेको थियो ।

अधिकारीले नै जापान पुगेर सो प्रकरणबारे जानकारी दिएको भन्दै सरकारी वकिलको कार्यालयले मुद्दा नचलाउने निर्णय गरेको हो । प्रहरीले भने अधिकारीसहित १२ जनालाई तीन वटा कसुरमा मुद्दा चलाउन सरकारी वकिललाई राय दिएको थियो ।

जापान पुगेका ३ जनालाई कात्तिक १६ गते त्रिभुवन अन्तर्राष्ट्रिय विमानस्थलबाट पक्राउ गरिएको थियो । पूर्वमन्त्री अधिकारीलाई भने कात्तिक २५ गते पक्राउ गरिएको थियो । प्रहरीले मन्त्रीसँगै जापान पुगेका खोटाङको केपिलासगढी गाउँपालिका- ४ का ४१ वर्षीय जनक राई, खोटाङकै ऐँसेलुखर्क गाउँपालिका–२ का ३७ वर्षीय दावा शेर्पा र रसुवाको कालिका गाउँपालिका- ५ का २१ वर्षीय कञ्चन देवकोटालाई पक्राउ गरेपछि थप ३ जनालाई पक्राउ गरेको थियो ।

अधिकारीसँग मिसाएर जापन पठाएको आरोपमा धादिङ त्रिपुरासुन्दरी गाउँपालिका- ६ का ३४ वर्षीय महेश पाण्डे, नुवाकोटको विदुर नगरपालिका- ७ का २२ वर्षीय जुगल रिजाल र दोलखाको जिरी नगरपालिका- ९ का ३० वर्षीय वीरबहादुर सुनुवारलाई पक्राउ गरिएको थियो । पक्राउपछि जापान प्रकरणमा उनीहरुको पनि संलग्नता खुलेको थियो । अनुसन्धानका क्रममा थप २ जनाको पनि संलग्नता खुलेको थियो ।

प्रहरीले खोटाङ घर भएका ४१ वर्षीय नवीन राई र ३२ वर्षीया गुड्डी राईलाई पनि पक्राउ गरेको छ । विष्णु भट्टराई, दिवाकर भट्टराई र गौपाल गौतम फरार छन् । गौतमले नै अधिकारीको पासपोर्टलगायतको कागजात लगेका थिए ।

जापान जाने बेला दिवाकरले पासापोर्टलगायतका कागजात दिएको अधिकारीले बताएका छन् । उनीहरुलाई फरार सूचीमा राखेर मुद्दा दायर भएको छ।