कैलालीमा पक्राउ परे ‘डन’ भन्दै अपहरण गरि कुटपिट गर्ने ३ जना

कैलाली । कैलालीमा युवकलाई अपहरण गरि कुटपिट गर्ने तीन जनालाई प्रहरीले नियन्त्रणमा लिएको छ ।

धनगढीमा दुई जना युवकलाई अपहरण गरी शरीर बन्धक बनाएर कुटपिट गरेको आरोपमा कञ्चनपुर बेलौरी नगरपालिका ५ का १८ बर्षिय युवक, डडेलधुरा अमरगढी नगरपालिका १ का अर्का १८ बर्षिय युवक र कैलाली गोदावरी नगरपालिका अत्तरियाका २४ वर्षीय भूपी खड्का पक्राउ परेको जिल्ला प्रहरी कार्यालय कैलालीले जानकारी दिएको छ ।

आइतबार धनगढीमा कोठा गरी बस्ने बझाङका मष्टा गाउँपालिका–१ का १८ वर्षीय एक युवक र केदारस्यु गाउँपालिका–६ का १७ वर्षीय अर्का युवालाई पक्राउ परेका तीन युवकले धनगढीस्थित कोठाबाट अपहरण गरेर अर्को घरमा बन्धक बनाएर कुटपिट गरेका थिए । त्यस क्रममा उनीहरूलाई लागू औषध समेत खुवाइएको प्रहरीले जनाएको छ ।

वडा प्रहरी कार्यालय धनगढीका प्रमुख प्रहरी निरीक्षक योगेश खत्री नेतृत्वको टोलीले सोमबार उनीहरूलाई पक्राउ गरेको जिल्ला प्रहरी कार्यालय कैलालीका प्रमुख प्रहरी उपरीक्षक (एसपी) पदमबहादुर बिष्टले जानकारी दिए ।

तीनै जनाले अपहरणमा परेका दुई युवकलाई उल्टो खुकुरी, लाठी र हातले कुटपिट गरेको भिडियो समेत बनाएका थिए । यसअघि उनीहरुको कोठामा प्रवेश गरेर लुगा धुने काममा लगाउने तथा जबरजस्ती खाना चोरेर लैजाने गरेको पनि प्रहरी अनुसन्धानबाट खुलेको छ ।

‘ती तीन जनाले धम्क्याउने कुटपिट गर्ने र ज्याजती गर्ने गरेको पाइएको छ। अहिले दुई घटनामा उनीहरुको संलग्नता देखिएको छ ’ कैलालीका प्रहरी प्रमुख प्रहरी निरीक्षक पलले भने, ‘ अन्य घटनाबारे पनि हामी बुझ्दै छौँ । अनुसन्धान जारी छ । उनीहरूमाथि कडा कारबाही हुन्छ।

यस्तै, सोही समूहले एक हप्ता अघि कैलालीको गोदावरी नगरपालिकाको वनखेतका अन्दाजी २२ वर्षीय अर्का एक युवकलाई समेत अपहरण गरेर शिवपुरी जङ्गलमा लगी कुटपिट गरेका खुलेको छ ।

‘शिवपुरी जङ्गलमा बन्धक बनाएर अर्धनग्न पारेर कुटपिट गर्नेमा पनि यहि समूह संलग्न रहेको देखिएको हो ’ प्रहरी प्रमुख पालले भने, ‘डन हौँ भन्दै युवालाई अपहरण गरि बन्धक बनाएर कुटपिट गर्दै लुटपाट गर्ने गरेको पाइएको छ ।’

प्रहरीले खुकुरीसहित उनीहरूलाई पक्राउ गरेको जनाएको छ । उनीहरुको मोबाइल समेत चेकजाँच गर्दा कुटपिट गरेको भिडियो भेटिएको प्रहरीले जनाएको छ । तीनै जनालाई आवश्यक कारबाही लागि हिरासत राखिएको र थप अनुसन्धान भइरहेको जिल्ला प्रहरी कार्यालय कैलालीका प्रवक्ता प्रहरी नायव उपरीक्षक कवीन्द्रसिंह बोहराले जानकारी दिए ।

उनका अनुसार पक्राउ पर्नेहरूले युवकहरूलाई कुटपिट गर्ने, अपहरण गर्ने बन्धक बनाउने र भिडियो रेकर्ड गरेर तर्साउने गरेका थिए । यसरी उनीहरुले लागू औषध खुवाउन दबाब दिने गरेको पनि प्रहरी नायव उपरीक्षक बोहराले जानकारी दिए ।