‘ह्रस्वदीर्घ’ ले २१ करोड कमाउने नीता ढुंगानाको आँकलन ! ३ करोड भारुमा ओटीटी राइट्स बेचेको दाबी

काठमाडौं । यतिबेला नेपाली बक्स अफिसमा तीन चलचित्रको रसाकस्सी छ । तिहार अगाडि नै रिलिज भएको ‘पूर्णबहादुरको सारंगी’ हलबाट उत्रिन मानिरहेको छैन भने त्यसपछि आएका ‘ह्रस्व दीर्घ’ र ‘तेल भिसा’ पनि हलहरूमा राम्रै हिस्सा ओगटिरहेका छन् ।

यी तीनमध्ये सबैभन्दा महंगो बजेटको चलचित्र हो ह्रस्वदीर्घ । यो चलचित्र करिब ६ करोड लगानीमा बनेको निर्माण पक्षको दावी छ । यति ठूलो लगानी रिकभर गर्न चलचित्रले बक्स अफिसमा लामै यात्रा गर्नुपर्ने हुन्छ । तर, निर्मात्री तथा अभिनेत्री नीता ढुंगानाले केही दिनअघि स्टाटस लेख्दै चलचित्रको लगानी सुरक्षित भइसकेको दावी गरिन् । धेरैले उनको दाबीलाई पत्यार गर्न नसकिरहेका बेला नीताले थप अगाडि बढेर आफ्नो चलचित्रले २१ करोड रूपैयाँ कमाउने आँकलन सार्वजनिकरूपमै गरेकी छन् ।

चलचित्रले नेपालमा रिलिजको ९ दिनसम्ममा ६ करोड ६९ लाख ग्रस कलेक्सन गरेको छ । २ दिनको ग्रस कलेक्सन भने सार्वजनिक गरिएको छैन । निर्माण पक्षले सार्वजनिक गरेको ग्रस कलेक्सनको अंकमा पनि कतिपयले आशंका गरिरहेका छन् । यदि त्यो रिपोर्ट यथार्थ हो भने पनि निर्माताको गोजीमा करिब तीन करोड मात्रै आउन सक्छ । भने, चलचित्रको लगानी सुरक्षित कसरी भयो त ?

यसबारे नेपाल प्रेससँग कुरा गर्दै नीता भन्छिन्, ‘मैले २१ करोडको आँकलन भनेको हो, २१ करोड कलेक्सन भएको भनेको छैन । ओभरसिज, ओटीटी, साउथको थियटर यताउता जोडेर त्यतिको अनुमान लगाएकी हुँ ।’

नीताको दावीअनुसार भारतमा ओटिटीबाट चलचित्रले ३ करोड भारु कमाएको छ, जसको नेपाली रकम हुन आउँछ ४ करोड ८० लाखभन्दा बढी । चलचित्रको डिजिटल राइट्स ओएसआर डिजिटललाई ६० लाखमा बेचेको उनले बताइन् । ओभरसिज राईट्सबारे भने आफूलाई ठ्याक्कै याद नभएको उनी बताउँछिन् ।

साउथ इन्डियन चलचित्र ‘पुष्पा २’ को रिलिजपछि आफ्नो चलचित्र साउथका थियटरहरुमा पनि लगाउने उनको योजना छ ।

नीता भन्छिन्, ‘सम्भवत अंग्रेजी नयाँ वर्षमा साउथका थिएटरमा हाम्रो चलचित्र रिलिज गर्नेछौं । साउथको थिएटर, नेपाल र बाहिरको डिजिटल राइट्स, नेपालको बक्स अफिस कलेक्सन र ओटीटी गरेर मैले २१ करोडको अनुमान लगाएकी हुँ ।’