राजेन्द्र र जगन्नाथको अडानले अड्कियो नेकपा एसको कार्यविभाजन

काठमाडौं । नेकपा एकीकृत समाजवादीमा नेताहरू नै अडानमा टसमस नभएपछि कार्यविभाजन विलम्ब भएको छ । वरिष्ठ उपाध्यक्ष राजेन्द्र पाण्डे संगठन विभाग प्रमुख आफूले पाउनुपर्ने अडानमा छन् ।

पार्टी अध्यक्ष माधव नेपालको नेतृत्वमा गठित कार्यदलले माथिल्लो कमिटीदेखि तल्लो तहसम्म नेताहरूको ‘एक पद एक व्यक्ति’ प्रणालीका आधारमा कार्य विभाजन गर्ने प्रयास गरेपनि पाण्डेको अडानको कारणले अहिलेसम्म कार्यविभाजनमा ढिलाइ भएको हो ।

कम्युनिष्ट पार्टीमा संगठन विभागको जिम्मेवारी महासचिवले पाउने प्रचलन छ । नेकपा एसको महासचिव घनश्याम भुसाल छन् । तर, वरिष्ठ उपाध्यक्ष पाण्डेले यो पदमा दाबी गरिरहेका छन् । पाण्डे अहिले संसदीय दलको उपनेता पनि छन् ।

गएको महाधिवेशनमा अरु पदमा निर्वाचन भएपनि मुख्य चार सर्वसम्मत चयन गरेको थियो । त्यही महाधिवेशनबाट सुरु भएको नेकपा एसभित्रको तरंग अझै साम्य भएको छैन ।

महाधिवेशनमा आफू अनुकूल नेतालाई जिताउनको लागि नेतृत्व तहबाटै चीट बाँडेको भन्दै असन्तुष्ट नेताहरूले जीवनराम श्रेष्ठ, विजय पौडेल, हरि पराजुली, बलराम बास्कोटालगायत नेताले अध्यक्ष नेपाललाई दुई बुँदे ज्ञापन पत्र समेत बुझाएका थिए ।

उनीहरूले ३४४ सदस्यीय केन्द्रीय कमिटी अवैध रहेको भन्दै पदाधिकारी र पोलिटब्युरो निर्वाचन खारेज हुनुपर्नेलगायतको माग राखेका थिए । तर, अध्यक्ष नेपालसहित शीर्ष नेताहरूले असन्तुष्ट नेताहरूसँग भेटेर तत्काललाई विवाद समाधान गरेका छन् । यद्यपि, अझै टरेको छैन ।

असन्तुष्ट नेताहरूलाई पनि सम्बोधन गर्नेगरी अध्यक्षले नेपालले आन्तरिक तयारी गरिरहेका छन् । स्रोतका अनुसार वरिष्ठ उपाध्यक्ष पाण्डे र उपाध्यक्ष जगन्नाथ खतिवडाले पनि मोर्चा संगठन प्रमुखको जिम्मेवारी पाउनुपर्ने अडान राख्नले पनि कार्यविभाजनमा ढिलाइ हुनुको अर्को कारण हो ।

उपाध्यक्ष खतिवडा अघिल्लो केन्द्रीय कमिटीको जिम्मेवारी अनुसार प्रचार विभाग र समाजवादी प्रेस संगठनको इन्चार्ज थिए । तर, अहिले फेरि प्रेस संगठनको जिम्मेवारी दिए विद्रोह गर्ने समाजवादी प्रेस संगठनको चेतावनीपछि खतिवडालाई अर्को जिम्मेवारी दिने तयारी भइरहेको छ ।

तर, वरिष्ठ उपाध्यक्ष पाण्डेले आफूलाई संगठन विभाग प्रमुखको अडानसँगै खतिवडालाई मोर्चा संगठन प्रमुख दिनुपर्ने पक्षमा उभिएपछि अध्यक्ष नेपाल अप्ठ्यारोमा परेका छन् ।

महाधिवेशन भएको लामो समय बितिसक्दा पनि नेकपा एसले पार्टी विभागीय प्रमुख तथा जनवर्गीय सङ्गठन, प्रदेश इञ्चार्जतोक्न सकेको छैन । नेकपा एसका उपमहासचिव राजकुमार भट्टराईले भने कार्यविभाजन चाँडै हुने दाबी गरे ।

उनले भने, ‘महाधिवेशनपछि बाढीपहिरोको प्रकोप, त्यसपछि चाडपर्वको कारणले छलफल गरेर टुंग्याउन सकेको थिएनौं। अहिले हामी छलफलको चरणमा छौं। हप्ता दशदिनभित्र टुंग्याउने तयारी छ ।’

उनले केही नेताहरूको आकांक्षाको कारणले ढिलाइ भइरहेको स्वीकारेपनि वार्तामार्फत् सबै नेताहरूलाई पार्टीले उपयुक्ति जिम्मेवारी दिने बताए ।