काठमाडौं १६ कि रास्वपा उम्मेदवारले प्रहरी हिरासतमै रविलाई भेटिन् (भिडिओ)

काठमाडौं । राष्ट्रिय स्वतन्त्र पार्टी (रास्वपा) सभापति रवि लामिछानेलाई काठमाडौं ल्याइनासाथ उपनिर्वाचनमा काठमाडौं १६ बाट पार्टीको उम्मेदवार बनेकी रोजिना श्रेष्ठले भेटेकी छन् । उनले जिल्ला प्रहरी परिसरमा पुगेर सभापति लामिछानेसँग भेटेकी हुन् ।

पार्टीका उपचुनाव कमाण्डर गणेश पराजुलीले रोजिनालाई लिएर प्रहरी परिसर पुगेका थिए । भेटपछि सञ्चारकर्मीसँग प्रतिक्रिया दिँदै पराजुलीले उपचुनावका सन्दर्भमा कुराकानी भएको बताए ।

‘सभापतिज्यूले हाम्रो उम्मेदवारसँग भेट्न चाहनुभएको थियो । आज भेट भयो । उहाँले जितको शुभकामना दिनुभएको छ । उपचुनावमा पार्टीको माहोल राम्रो छ भन्ने कुराले उहाँ उत्साहित हुनुहुन्छ’, पराजुलीले भने ।

हिरासतभित्र रवि उच्च मनोबलमा रहेको देखेर आफूहरुको हौसला बढेको पराजुलीको भनाइ छ ।

रविसँग भेटपछि काठमाडौं १६ की उम्मेदवार श्रेष्ठले उपचुनावमा आफ्नो विजय निश्चित रहेको बताइन् ।