रविलाई एकल हिरासत कक्षमा राखियो, भोलि नै बयान सक्ने दाबी

काठमाडौं । सहकारी ठगी मुद्दामा बयानका निम्ति पोखराबाट काठमाडौं झिकाइएका पूर्वगृहमन्त्री एवम् रास्वपा सभापति रवि लामिछानेलाई एकल बसाई हुने गरी हिरासतको व्यवस्था मिलाइएको छ ।

जिल्ला प्रहरी परिसर, भद्रकालीमै रहेको एक हिरासत कक्षामा उनलाई राखिएको परिसरका प्रवक्ता एसपी नवराज अधिकारीले बताए । सामान्यतया हाइप्रोफाइल थुनुवाले आवासीय सुविधायुक्त कोठा वा अस्पतालमा बस्न रुचि राख्छन् । तर, लामिछानेले त्यस्तो केही माग नगरेको प्रवक्ता अधिकारीले बताए । ‘यहाँ विभिन्न प्रकारका हिरासत कक्ष छन्, उहाँलाई तीनैमध्ये एउटामा राखेका छौं’, उनले भने ।

रविलाई शुक्रबार बिहानै बयानका निम्ति भद्रकालीमै रहेको जिल्ला सरकारी वकिलको कार्यालयमा लगिने छ । ‘हामीले गर्नुपर्ने अलग्गै काम केही छैन, बयानका निम्ति पठाउने हो, काम सकिएपछि पोखरा पठाइदिने हो’, उनले भने ।

जिल्ला सरकारी वकिलको कार्यालय, भद्रकालीका प्रमुख सहमहान्यायाधीवक्ता सन्देश श्रेष्ठले रविको बयान लिन भोलि दिनभरिको समय लाग्ने बताए । ‘प्रश्नहरु कति आउँछन्, त्यस आधारमा बयानको समय भन्न सकिन्छ’, उनले भने, ‘हाम्रो प्रयास भोलि नै सक्ने छ ।’

जिल्ला प्रहरी परिसरको हिरासत व्यवस्थापनमा कार्यरत प्रहरीका अनुसार रविले सादा खाना र तातोपानीको व्यवस्था गर्न माग गरेका छन् । ‘उहाँमात्र नभई कसैलाई पनि बाहिरको खाना दिने गरिदैन’, उनले भने ।