गुल्मीको मुसिकोट १ मा कांग्रेसको विरासत कायम, माओवादीले थपिदियो मत

रुपन्देही ।गुल्मीको मुसिकोट नगरपालिका वडा नं १ मा नेपाली कांग्रेस विजयी भएको छ । यहाँ यसअघि पनि नेपाली कांग्रेस नै विजयी भएको थियो । काङ्ग्रेसबाट उम्मेदवार बनेका आनन्द श्रेष्ठले ११८४ मत ल्याएर विजयी भएका हुन् ।

एमालेका  दलबहादुर थापाले  ९३० मत ल्याएका थिए । माओवादी केन्द्रका दुर्गाबहादुर विकले १४३ मत ल्याएका छन् । गत निर्वाचनमा ३९ मतले मात्रै हारेको एमालेलाई हराउन माओवादीले  कांग्रेस उम्मेदवारलाई साथ दिएको आरोप लागेको छ ।

माओवादी केन्द्रका नेताहरूले यहाँ कांग्रेस, एमाले र आफ्नो त्रिपक्षीय प्रतिस्पर्धा रहेको बताएका थिए । नेकपा एस, विप्लव नेतृत्वको माओवादीसमेतको साझा उम्मेदवार बनेका माओवादी केन्द्रका दुर्गाबहादुर बिकको अपेक्षित मत पाउन सकेनन् ।

आइतबार भएको  निर्वाचनमा २ हजार ३ सय ३४ मत खसेको थियो । मुसिकोट नपा १ मा ४ हजार ९१ मतदाता थिए । २०७९ मा काङ्ग्रेसबाट विजयी उम्मेदवार मोहन घिमिरेको मृत्यु भएपछि उपनिर्वाचन भएको थियो ।