सशस्त्रका सई यादवलाई गाडीले ठक्कर दिएर ज्यान लिएको आरोपमा दुईजना पक्राउ

जनकपुरधाम । सिरहाको बरियारपट्टी गाउँपालिका १ कचनारीमा सशस्त्र प्रहरीका सई लक्ष्मण यादवलाई मारेको आरोपमा प्रहरीले दुईजनालाई पक्राउ गरेको छ ।

घटनामा संलग्न रहेको आशंकामा दुई जनालाई नियन्त्रणमा लिएर अनुसन्धान गरिरहेको सिरहाका प्रहरी प्रमुख एसपी रमेश पण्डितले जानकारी दिए । उनले पक्राउ परेकाको पहिचान तत्काल खुलाउन चाहेनन् । तर ठक्कर दिने गाडी र व्यक्तिको पहिचान भइसकेको उनले बताए ।

आइतबार बिहान करिब ३ बजे ड्युटीमै रहेका सई यादवलाई नम्बर खुल्न नसकेको गाडीले ठक्कर दिएर भारततर्फ भागेको थियो ।

सई यादवलाई ठक्कर दिएर ज्यान लिएको गाडी मदिरा तस्करको भएको अनुमान प्रहरी छ ।

एसपी पण्डित भन्छन्, ‘ठक्कर दिने व्यक्ति भारतको हो । पक्राउ गर्न हाम्रो हेडक्वाटरले पनि भारतसँग समन्वय गरिरहेको छ । हामी पनि लागेका छौं ।’

मृतक सई बरियारपट्टी गाउँपालिका १ स्थित बिओपी बरहरीमा कार्यरत थिए । नरहा गाउँपालिका ४ ललभितियाका उनका दुई छोरी र श्रीमती छन् ।