हुम्लाको सर्केगाड गाउँपालिकाको उपाध्यक्षमा माओवादी उम्मेदवार तिमिल्सीना विजयी

काठमाडौं । हुम्लाको सर्केगाड गाउँपालिका पनि नेकपा (माओवादी केन्द्र)ले नै जितेको छ । निर्वाचन आयोगका अनुसार गाउँपालिकाको अध्यक्षमा माओवादीका उम्मेदवार देवकी तिमल्सीनाले नेपाली काँग्रेसका उम्मेदवार सविता बुढालाई पराजित गर्दै उपाध्यक्षमा निर्वाचित भएकी हुन् ।

माओवादीका उम्मेदवार तिमल्सीनाले काँग्रेसका उम्मेदवार बुढालाई ४३ मतान्तरले मात्रै पछि पार्दै जित हासिल गरेकी हुन् । जसमा तिमल्सीनाले १ हजार ६३७, बुढाले १ हजार ५९४, नेकपा (एमाले)का उम्मेदवार जाना शाहीले ४७१ मत प्राप्त गरेकी छन् ।

यस्तै राष्ट्रिय प्रजातन्त्र पार्टीका उम्मेदवार संगिता शाहीले ५१, राष्ट्रिय स्वतन्त्र पार्टीका उम्मेदवार बाँचा बुढाले २५ र स्वतन्त्र उम्मेदवार नरेश शाहीले ९ मत मात्रै प्राप्त गरेका छन् । जम्मा ४ हजार ५२६ मत खसेकोमा ७८ मत भने बदर भएका छन् ।

सर्केगाड गाउँपालिकाको उपाध्यक्षमा यस अघि २०७९ सालमा सम्पन्न स्थानीय तहको निर्वाचनमा पनि माओवादी केन्द्रकै उम्मेदवार निर्वाचित भएका थिए । यस पटक सम्पन्न उपनिर्वाचन मध्ये कर्णाली प्रदेशमा वडा बाहेक २ पालिका उपाध्यक्षको निर्वाचनमा दुबै पालिकामा माओवादी केन्द्रकै उपाध्यक्ष निर्वाचित भएका छन् ।

जाजरकोटको नलगाढ नगरपालिकाको उपाध्यक्षमा माओवादीका देवका लामिछाने यस अघि नै निर्वाचित भइसकेकी छन् । यद्यपी दैलेखको महाबु गाउँपालिका अध्यक्षमा भने एमालेको उम्मेदवार निर्वाचित भएको छ ।