जनमतलाई सभामुखको जवाफ- कुनै विभेद भएको छैन, गोमा लाभबारे लिएको निर्णय कानूनअनुसार हो

काठमाडौं । संघीय संसद सचिवालयले सांसद गोमा लाभ सापकोटाका सम्बन्धमा जनमत पार्टीबाट जारी भएको प्रेस विज्ञप्तिप्रति आपत्ति जनाएको छ । पार्टीको कारबाही सिफारिस गर्दा पनि सभामुखले रोकेको भन्दै जनमतका प्रवक्ता शरद यादवले सभामुखको राजीनामा माग्दै हिजो विज्ञप्ति निकालेका थिए ।

त्यसको जवाफ दिँदै संघीय संसद सचिवालयका सहायक प्रवक्ता अनन्तप्रसाद कोइरालाले संघीय संसद सचिवालयबाट कुनै पनि जातजाति, वर्ण, रंग, लिङ्ग, समुदाय, भाषा, धर्म तथा शारीरिक अवस्थालगायतका कुनै पनि आधारमा विभेद नभएको र नहुने कुरा स्पष्ट पारेका छन् ।

जनमतलाई सभामुखको तर्फबाट संसद सचिवालयले दिएको जवाफमा भनिएको छ, ‘जनमत पार्टीबाट समानुपातिक सदस्यमा निर्वाचित प्रतिनिधिसभा सदस्य माननीय गोमा लाभ (सापकोटा)लाई पार्टीको विधानबमोजिम कारबाही गरी साधारण सदस्यसमेत नरहने गरी निष्कासन गरिएको भनी राजनीतिक दलसम्बन्धी ऐन, २०७३ को दफा ३५ को उपदफा (२) बमोजिमको प्रक्रिया अगाडि बढाइदिन संघीय संसदको महासचिवलाई सम्बोधन गरी पत्र लेखी आएपछि संघीय संसद सचिवालयले सो विषयमा नेपालको संविधान र सम्बन्धित कानूनहरु (प्रतिनिधिसभा नियमावली, २०७९ र राजनीतिक दलसम्बन्धी ऐन, २०७३० का प्रावधानहरुको व्यवस्थाबमोजिम निर्णयार्थ पेश गरेको र सम्माननीय सभामुखले कानूनबमोजिम निर्णय गर्नुभएको व्यहोरा जानकारी गराउन चाहन्छौं ।’

सभामुखको निर्णयमा सबै विषयको व्यहोरा स्पष्टसमेत रहेको उल्लेख छ । संसद सचिवालय कानूनी राज्यमा हरेक कामकारबाहीहरु कानूनबमोजिम हुनुपर्दछ भन्ने विषयमा सदैव सजग रहेको पनि विज्ञप्तिमा उल्लेख छ ।