एकीकृत समाजवादीको स्थायी कमिटीको बैठक सुरु, टुंग्याउँला नेताहरूको कार्यविभाजन ?

काठमाडौं । नेपाल एकीकृत समाजवादीको स्थायी कमिटी बैठक सुरु भएको छ । भोलिसम्म चल्ने बैठक केही समयअघि पार्टी केन्द्रीय कार्यालय आलोकनगरमा सुरु भएको हो ।

उपमहासचिव रामकुमार भट्टराईका अनुसार बैठकले पार्टीको देशभर साङ्गठनिक गतिविधि, जिल्ला तथा प्रदेशका अधिवेशन, स्थानीय तहको उपनिर्वाचनको समीक्षा, मुलुकको समसामयिक राजनीतिक विषयवस्तु, नेताहरूको कार्यविभाजन तथा संरचनामा फेरबदलसम्बन्धी निर्णय लिनेछ ।

गत असारमा महाधिवेशन गरेको नेकपा एसले अहिलेसम्म नेताहरूको जिम्मेवारी हेरफेर तथा कार्यविभाजनअन्तर्गत विभिन्न विभागीय प्रमुख, जिल्ला इन्चार्ज, आयोग तथा जनसङ्गठन इन्चार्ज तोक्न सकेको छैन ।

पार्टी संरचनामा कार्यविभाजन गर्न पार्टी अध्यक्ष माधवकुमार नेपालको नेतृत्वमा गठित कार्यदलले टुङ्गो लगाएको नामावली बैठकले अनुमोदन गर्ने तयारी छ ।