नेपालकै ठूलो मल्टिभेन्यु ‘द प्लाजा’ सञ्चालन, सामान्यदेखि अन्तर्राष्ट्रिय सभा गर्न सकिने  

काठमाडौं । ललितपुरको झम्सिखेलमा नेपालको सबैभन्दा ठूलो मल्टिभेन्यु ‘द प्लाजा’ सञ्चालनमा आएको छ । सिजी होल्डिङ्स कम्पनीले अन्तर्राष्ट्रिय स्तरको खाना र सेवासहितको मल्टिभेन्यु सञ्चालनमा ल्याएको हो ।

एक अर्ब ५० करोड रुपैयाँभन्दा लगानीमा निर्माण भएको ‘द प्लाजा’को व्यवस्थापन सिग्नेचर इभेन्ट्स प्रालिले गरिरहेको छ । प्रालीकी बिक्री तथा मार्केटिङ निर्देशक पुनम थापाका अनुसार ४३ हजार वर्ग फिटमा निर्माण भएको द प्लाजामा तीन सयभन्दा बढी कार पार्किङको सुविधा छ ।

‘यहाँ जस्तोसुकै इभेन्ट गर्छु भन्दा पनि हुन्छ । विवाहदेखि ठूला ठूला कार्यक्रम गर्न सक्ने व्यवस्था मिलाएका छौँ । प्लाजामा राष्ट्रिय तथा अन्तर्राष्ट्रिय सभा सम्मेलन, विवाह तथा व्रतबन्धलगायत कर्पोरेट बैठक र सानादेखि ठूला कार्यक्रम गर्न सकिन्छ । द प्लाजामा आवश्यकता अनुसार सचिवालय र भिआइपी कक्षको पनि सुविधा छ’, उनले भनिन् ।

थापाका अनुसार कूल १२ हजार वर्ग फिटको ठूलो हलमा थिएटर सेटअप एकै साथ दुई हजार पाँच सयभन्दा बढी व्यक्ति बसेर कार्यक्रम गर्न सकिन्छ छ । ठूलो हललाई आवश्यकताअनुसार दुई र तीन वटा हलमा विभाजन गरेर पनि कार्यक्रम गर्न सकिन्छ ।

‘नेपालमा साधारण बैंक्वेट धेरै छन् । तर, यस्तो खालको मल्टीभेन्यु भने छैन । यो नेपालकै सबैभन्दा ठूलो मल्टिभेन्यु हो । यस्तो भेन्यु नेपालमा कतै पनि छैन । स्ट्याण्डर्ड लेभलको भेन्युको पनि आवश्यकता छ भनेर हामीले सञ्चालनमा ल्याएका हौँ’, भेन्युको व्यवस्थापन हेरिरहेका अर्जुनराज गिरीले भने ।

कार्यक्रमको उच्च स्तरको व्यवस्थापनका लागि द प्लाजाले आवश्यकताअनुसार आधुनिक र उच्च प्रविधिको साउण्ड तथा लाइट, सांस्कृतिक कार्यक्रम, मल्टिमिडिया र अडियो भिजुअलसहितको प्रबन्ध गर्ने गिरीले जानकारी दिएका छन् ।