मेरा लागि ललित राजवंशी उत्कृष्ट खेलाडी हुन्: प्रशिक्षक पुबुदु (भिडिओ)

काठमाडौं । जनकपुर बोल्ट्सका प्रशिक्षक पुबुदु दसानायकेले आफ्ना लागि स्पिनर ललित राजवंशी नै प्रतियोगिताको उत्कृष्ट खेलाडी रहेको बताएका छन् ।

फाइनलपछिको पत्रकार सम्मेलनमा प्रशिक्षक पुबुदुले आफ्नो टोलीका स्पिनर ललितले प्रतियोगिताभर उत्कृष्ट बलिङ गरेको र उनी नै आफ्ना लागि उत्कृष्ट खेलाडी रहेको बताए ।

उनले कहिलेकाहीँ रनमा मात्र ध्यान हुने उल्लेख गर्दै ललितको प्रदर्शन नै खेलको महत्वपूर्ण पक्ष रहेको बताए । ललितले ब्याटिङ पिचमा पनि राम्रो बलिङ गरेको प्रशिक्षक पुबुदुको भनाइ छ ।

आफू जनकपुरको प्रशिक्षक भएरमात्र ललितलाई समर्थन नगरेको र उनी नै प्रतियोगिताको प्रमुख खेलाडी रहेको उनी बताउँछन् ।

यद्यपि उनले दीपेन्द्रसिंह ऐरीले पनि राम्रो खेलेको बताए । उनले पावर प्लेमा आसिफ शेख र लाहिरु मिलन्थाले खेलको माहोललाई परिवर्तन गराएको प्रतिक्रिया दिए ।

प्रशिक्षक पुबुदुले भने, ‘एनपीएलमा नेपालका सिनियर र युवा खेलाडीले राम्रो प्रदर्शन गरेका छन् । यो नै सुखद पक्ष हो । स्टार खेलाडीसँग एउटै ड्रेसिङ रुम शेयर गर्न पाउँदा युवा खेलाडीहरूमा थप आत्मविश्वास बढ्नेछ ।’