मलेसिया दूतावासमा ‘टीके’असुली र दबदबा, पासपोर्ट बनाउन आउने श्रमिक कुटिए

क्वालालम्पुर । मलेसियायाका लागि भर्खरै नियुक्त भएका नेपाली राजदूत नेत्र तिमल्सिना कार्यभार सम्हाल्न आउनुअघि नै यहाँ बिचौलियाको भूमिकामा रहेकाहरुले श्रमिकलाई दुःख दिएको गुनासो आएको छ ।

दूतावासकै सेटिङमा ठगी भइरहेको आरोप समेत लागेको छ । नवनियुक्त राजदूतले कार्यभार सम्हाल्न आउनु अगाडि नै यहाँको दूतावासले ’टिके’ भूमिका दिएकाहरूको अत्याचारले सीमा नाघेको गुनासो मलेसियामा कार्यरत श्रमिक संगठनहरुले गरेका छन् ।

उनीहरूले राहदानी ’रिन्यु’ गर्न आउनेलाई हातपात मात्रै गरेका छैनन्, नेपाली कामदारको माग गर्ने कम्पनीहरूमा ’भिजिट’को नाममा रकमको ’बार्गेनिङ’ र असुली धन्दा नै चलाएको आरोप समेत छ ।

असुलीका लागि ’डिमान्ड लेटर’ नै बदल्न लगाएर कामदारलाई ठग्ने र सेटिङमा सीमित व्यक्तिहरूले कमाउने चलखेल समेत उनीहरूले गरेका छन्।

बोम सुनार र टेक बुढा तथा पैसाकै लागि मुस्लिमसँग विवाह गरी धर्म परिवर्तन गर्ने जयप्रकाश गिरी, बिकी अधिकारी र उत्तम कार्कीले दूतावासको नाममा यस्तो असुली धन्दा चलाएका हुन्।

दूतावासका सवारी चालक सुन्दर श्रेष्ठले त रकम बोलकबोल नगरेको भन्दै पासपोर्ट ’रिन्यु’ गर्न आउने एक मजदुरलाई नै कुटेका छन्। असुलीकर्ता उल्लेखित सबै व्यक्तिहरू र चालक श्रेष्ठ नेपालका कुनै न कुनै वैदेशिक रोजगार कम्पनीसँग सम्बन्धित रहेको बताइएको छ ।

नवनियुक्त राजदूत तिमल्सिनाले यिनलाई छानिछानी कारबाही नगरे मलेसियामा नेपाली रोजगारीमा थप धक्का पुग्ने मात्र होइन, देशकै इज्जत–प्रतिष्ठा समेत आघात पर्ने भन्दै बेनामी उजुरी समेत परेको छ ।