भूकम्प प्रभावितलाई नबिल बैंकले दिएको अस्थायी आवासको राहतः यसो भन्छन् प्रभावित

काठमाडौं । जाजरकोटको बारेकोट गाउँपालिका–१, रामीडाँडा केन्द्रविन्दु भएर गएको ६.४ रेक्टर स्केलको भूकम्पले जाजरकोट र रुकुम पश्चिममा ठूलो क्षति पुर्‍यायो । २०८० साल कात्तिक १७ गते गएको भूकम्पले धेरैलाई घरबारविहीन बनायो ।

भूकम्पबाट प्रभावित बनेकाहरूलाई नबिल बैंकले एक करोड रुपैयाँको बराबरको सहयोगको घोषणा गरेको थियो । सोही अनुरूप त्रिपालमा बस्न बाध्य भएका भूकम्प प्रभावितहरूका लागि नबिल बैंकले राहत प्रदान गर्न अस्थायी आवास निर्माण गरिदिएको छ ।

बैंकले आफ्नो संस्थागत सामाजिक उत्तरदायित्व अन्तर्गत अस्थायी आवास निर्माण गरिदिएपछि भूकम्प प्रभावितहरू खुसी भएका छन् । भूकम्प प्रभावित विस्मी विक भन्छिन्, ‘यो घर बनाउने बेलामा एक्लै थिए । ७ जना मिस्त्री लगारएर बनाए । सात लाख ऋण लिएको थिए । त्यसको ब्याजसहित १० लाख तिरे । घरको ऋण तिरिपनि सके पछि घर पनि भत्कियो ।’

पैसा नभएर घर बनाउने नसकिरहेको बेलामा नबिल बैंकले सित्तैमा अस्थायी टहरा बनाइदिएकोमा उनले खुसी व्यक्त गरिन् । ‘त्यत्रो खर्च गरेर बनाएको घर त भत्क्यो । यो त सित्तैमा दिएको टहरा हो । त्यसमै खुसी छु’, उनले भनिन् ।

अर्का भूकम्प प्रभावित हस्त बहादुर चनराले यो टहरामा बसेपछि बाच्छौँ भन्ने लागे सुनाए ।

नबिल बैंकले सहयोग गरेपछि टहरा बनाउन शुरु गरेको सुनाउँदै अर्की प्रभावित सीता चनरा भन्छिन्, ‘बास बनाइदिएर नबिल बैंक भगवान् जस्तै लाग्ने भयो ।’

भूकम्प प्रभावित बलजित कामीले खुसी हुँदै भने, ‘आफ्नो बस्ने बास बनाउन आर्थिक कमजोर भएपछि नबिल बैंकले सहयोग गरिसकेपछि हामी खुसी हुने भइहाल्यौँ ।’

टहरा पाएपछि निरुता लामिछानेले सबैभन्दा बढी खुसी पढ्न पाएकोमा लगेको सुनाइन्  ।

अर्की प्रभावित लीलाकुमारी कामीले भनिन्, ‘बाँस पायौँ, जस्ता पायौँ, हुक पायौँ, सिमेन्ट पायौँ । सहयोग पाएपछि खुसी भइहालिन्छ नी । टहरा नै भएपनि मलाइ उनै राजा ।’

जाजरकोट र रुकुम पश्चिमका भूकम्प पीडितलाई नबिल बैंकले दिएको अस्थायी आवासको राहत दिएको छ । बैंकले भूकम्पपछि निर्माण गरेका ९६ वटा अस्थायी आवास निर्माण गरेर भूकम्प प्रभावितलाई हस्तान्तरण गरेको छ ।

बैंकले स्थानीय सरकारसँगको साझेदारीमा जाजरकोटको नलगाड नगरपालिकाको वडा १ मा ४७ र रुकुम पश्चिमको चौरजहारी नगरपालिकाको वडा १ मा ४९ अस्थायी आवास निर्माण गरेको थियो । बैंकले अस्थायी आवास बनाउन आवश्यक जस्तापाता, बाँस, सिमेन्ट, रंगरोगन, किल्ला काँटीजस्ता निर्माण सामग्री उपलब्ध गराएको थियो ।

उक्त अस्थायी आवास नबिल बैंकका अध्यक्ष उपेन्द्रप्रसाद पौडेलले नलगाड नगरपालिकाका मेयर डम्बरबहादुर रावत र चौरजहारी नगरपालिकाका मेयर पुष्प वादीलाई आवास हस्तान्तरण गरिसकेका छन् ।