नेपाल आइपुगे सोनु निगम, बेलुका हायात मैदानमा प्रस्तुति दिने (भिडिओ)

काठमाडौं । भारतका चर्चित गायक सोनु निगम नेपाल आइपुगेका छन् । बुधवार क्रिसमसको अवसरमा बौद्ध तुसालमार्गस्थित ह्यात चौरमा आफ्नो सांगीतिक प्रस्तुति दिन निगम अपरान्ह काठमाडौं आइपुगेका हुन् ।

निगमको सांगीतिक समूहका सदस्यहरू भने बुधबार बिहानै तयारीका लागि आइसकेका छन् ।

प्रशस्तै हिट नेपाली गीतसमेत गाइसकेका निगमलाई स्वागत गर्न आयोजक नेपाल टचका पदाधिकारी त्रिभुवन अन्तर्राष्ट्रिय विमानस्थल पुगेका थिए ।

उनलाई स्वागत गर्न चर्चित हाँस्य कलाकार सन्दीप क्षेत्री पनि विमानस्थल पुगेका थिए । उनलाई विमानस्थलमा सन्दीप र आयोजक टीमले नेपाली ढाका टोपी लगाएर स्वागत गरेका थिए ।

नेपाल टेकेपछि निगमले आफ्नो प्रस्तुति दिन आफू उत्साहित रहेको प्रतिक्रिया दिए । निगमले बेलुका हायात रिजेन्सीको मैदानमा हुने कन्सर्टमा प्रस्तुति दिनेछन् । झण्डै १० हजार दर्शक सहभागी हुने अपेक्षा गरिएको कन्सर्टमा निगमले ३ घण्टा आफ्ना गीतमार्फत दर्शकलाई मनोरञ्जन दिनेछन् ।

कन्सर्टमा निगमले नेपाली चलचित्र ‘सिमाना’को चर्चित गीत ‘उकाली ओराली गर्दै’ लगायतका आधा दर्जन नेपाली गीत पनि गाउनेछन् ।

कन्सर्टपछि निगम बिहीबार बेलुका भारत फर्किने तयारी छ । त्यसअघि उनले बिहीबार बिहान पशुपतिनाथ दर्शन र पर्वतीय उडान भर्नेछन् ।