अशोक शर्मा भन्छन् : महामारीले नेपाली फिल्म १० वर्ष पछाडि धकेलिन्छ

काठमाडौं । फिल्म निर्देशक एवं निर्माता अशोक शर्माले कोरोना महामारीको कारणले नेपाली फिल्म क्षेत्र १० वर्ष पछाडि धकेलिने बताएका छन् ।

सोमबार सम्पन्न नेपाल अन्तर्राष्ट्रिय चलचित्र महोत्सव (नीफ)को चौथो संस्करणमा बोल्दै उनले फिल्म क्षेत्र तत्काल सामान्य अवस्थामा फर्कने सम्भावना नरहेको बताए ।

उनी भन्छन्, ‘कोरोनाको कारणले फिल्म हेर्ने दर्शकहरुको बानीमा ब्रेक लागेको छ । स्थिति सामान्य भएर फिल्म रिलिज भएपनि केही समय दर्शक हलमा आउदैनन् । यसको लागि ठूलो मिहेनत गर्नुपर्छ ।’

फिल्म निर्माण सकेर रिलिज हुने तयारीमा रहेका निर्माताहरु बढी मारमा परेका छन् । कोभिडको पहिलो लहरपछि देशभर २२ वटा फिल्म हल सधैका लागि बन्द भइसकेका छन् ।

अहिलेकै अवस्था रहे मल्टिप्लेक्स पनि नटिक्ने अवस्था रहेको उनले बताए । अरुभन्दा फिल्म क्षेत्र सबैभन्दा बढी मारमा परेको उनले बताए ।

कोभिडपछि फिल्म रिलिजका लागि ओटीटी प्लेटफर्ममार्फत आकर्षण बढे पनि यो सेकेन्डरी मार्केटका लागि मात्र ठीक हुने बताउँछन् । शर्मा भन्छन्, ‘ओटीटी प्लेटफर्ममा संसारभर एकसाथ फिल्म हेर्न पाइन्छ तर पहिलो प्राथमिकताको मार्केट भन फिल्म हल नै हो ।’