मुख्यमन्त्री सिंहलाई सत्तारुढ कांग्रेसकै सांसदले भने- काम गर्न सक्नुहुन्न भने ठाउँ छाड्नुस्

जनकपुरधाम । मधेश प्रदेशका सत्तारुढ दल नेपाली कांग्रेसकै सांसद मो. समिमले काम गर्न नसकिए ठाउँ छाड्न मुख्यमन्त्री सतिश कुमार सिंहसँग आग्रह गरेका छन् ।

प्रदेशसभा बैठकमा बोल्दै सांसद समिमले गठबन्धनका नेताहरुमाथि जनमत पार्टीका अध्यक्ष डा. सीके राउतले काम गर्न नदिएको आरोप लगाएको सन्दर्भमा आपत्ति जनाए । उनले प्रश्न गरे- गठबन्धनकै साथीहरुको बुँई चढेर मुख्यमन्त्री बन्ने र गठबन्धनकै साथीहरुलाई लुटेरा र डाका भन्ने ?

मुख्यमन्त्रीलाई उनले भने, ‘आफैं काम नगर्ने तर अर्थमन्त्रीलाई स्पष्टीकरण सोध्ने ? यो कदापी सहन सक्दिनँ । स्टन्टबाजी गर्ने ? काम गर्न सक्नुहुन्न भने ठाउँ छाडे हुन्छ ।’

सांसद समिमले बजेट भाषण भएको र रेडबुक आएको धेरै समय बितिसक्दा पनि विकास निर्माणको काम किन भइरहेको छैन भन्ने प्रश्न गरे । उनले मुख्यमन्त्रीलाई नै काम गर्न सक्नुहुन्न भने जिम्मेवारी लिनुपर्ने बताए ।