भेटिए नयाँ ओपनर !

काठमाडौं । जारी जय ट्रफी एलिट कपमा मधेश प्रदेशका ओपनिङ ब्याट्सम्यान मयन यादवले बलियो प्रभाव छोडिरहेका छन् । पहिलो खेलको दोस्रो इनिङमा बाग्मती प्रदेशविरुद्ध शानदार शतक हानेका उनले दोस्रो खेलको पहिलो इनिङमा अर्धसतक बनाउँदै आफ्नो उत्कृष्ट प्रदर्शनलाई निरन्तरता दिए ।

बलियो नेपाल पुलिस टीमविरुद्ध मयनले संयमित र सुझबुझपूर्ण ब्याटिङ गर्दै १०२ बलमा ५९ रन बनाएर आउट भएका थिए । तर, अन्य ब्याटरहरु चल्न नसक्दा मधेशले उल्लेख्य स्कोर बनाउन सकेन । टिम १२९ रनमै समेटियो । हारबाट जोगिनका लागि दोस्रो इनिङमा टिमले ब्याटिङमा गतिलो कमब्याक गर्न सक्नुपर्ने छ ।

मयनले लगातार तेस्रो इनिङमा टिमका लागि सर्वाधिक व्यक्तिगत स्कोर बनाएका हुन् । बाग्मतीविरुद्ध पहिलो खेलको पहिलो इनिङमा उनले २६ बलमा २१ रन जोडेका थिए । मधेशको ब्याटिङ पूर्णरुपमा फ्लप हुँदा टिमले १०२ रन मात्रै जोड्न सकेको थियो । बाग्मतीले १५० रनाउँदै ४९ रनको अग्रतासहित जितको आधार बनाएको थियो ।

तर, दोस्रो इनिङमा बाग्मतीका बाधक बने मयन । प्रतियोगितामै सबैभन्दा बलियो बलिङ युनिट रहेको बाग्मतीविरुद्ध चुनौतिपूर्ण कन्डिसनमा उनले शतकीय पारी खेल्दै आफ्नो टीमको उद्धार गरेका थिए । राष्ट्रिय टोलीका थुप्रै स्टार ब्याट्सम्यानहरूको उपस्थिति रहेको प्रतियोगितामा पहिलो शतक यी १८ वर्षिय किशोरको ब्याटबाट निस्कियो ।

मंयकले १०८ बलमा १०६ रन बनाएर आउट भएका थिए, जसमा १२ चौका र २ छक्का समावेश छन् । उनी दुवै इनिङमा बाग्मतीका कप्तान सन्दीप लामिछानेको शिकार भए । तर, दोस्रो इनिङमा मयंकले जसरी सन्दीपको लेग स्पिनलाई खेले, त्यसमा उनले गर्व गर्न सक्नेछन् । ठूलो नाम भएका स्पिनरविरुद्ध ठूला सटहरु हान्न मयनले कुनै संकोच मानेनन् ।

यो इनिङले मयनलाई नेपालकै एक उदियमान ब्याट्सम्यानको परिचय दिएको छ । उनलाई नेपाली राष्ट्रिय टीमकै सम्भावित ओपनरका रुपमा समेत हेर्न थालिएको छ । एउटा ओपनिङ ब्याटरमा हुनुपर्ने थुप्रै विशेषताहरु मयंकले देखाएका छन् ।

मयनको यो शतक भाग्यवस वा कागतालीमा आएको थिएन । बागमतीको सुदृढ बलिङ युनिट, जसमा कप्तान सन्दिपसहित हालै एनपीएलमा उत्कृष्ट प्रदर्शन गरेका तीन फास्ट बलर नन्दन यादव, प्रतिश जिसी र रिजन ढकाल समेत रहेका छन्, विरुद्ध उनले जसरी ब्याट चलाए, त्यसले पक्कै पनि राष्ट्रिय टिमका चयनकर्ताहरूको मुख रसाएको हुनुपर्छ ।

यदि यो शतक मयनको क्षमता पुष्टि गर्न पर्याप्त थिएन भने आज उनले त्यसको पुनःपुष्टि गरेका छन् । पुलिस क्लबविरुद्ध उनले जुझारु ब्याटिङ गर्दै ५९ रन जोडे, जसको ठूलो मूल्य छ । राष्ट्रिय खेलाडीहरुले भरिएको पुलिस विरुद्ध मधेश पक्कै पनि कमजोर स्थितिमा छ, तर मयनको प्रदर्शनले मधेशका समर्थकहरु हौसियका छन् । दोस्रो इनिङमा फेरि पनि उनको ब्याट चलेमा, मधेशमा जित्न त नसक्ला, तर हार पन्छाउन अवश्य सक्छ ।

मयनले आफ्नो प्रतिभाको छनक गत वर्ष सम्पन्न प्रधानमन्त्री कपमा पनि दिएका थिए । उक्त प्रतियोगितमा मधेश टिमबाट सुदुरपश्चिमविरुद्ध शतक बनाउँदै घरेलु क्रिकेटमा आफ्नो इन्ट्रीको उद्घोष गरेका थिए उनले । सो प्रदर्शनले उनलाई राष्ट्रिय यु १९ टीममा स्थान दिलायो । गत डिसेम्बरमा भएको अन्डर १९ एसिया कपमा उनले नेपाली टीमको ओपनरको जिम्मेवारी पाए ।

पहिलो खेलमा टेस्ट राष्ट्र श्रीलंकाविरुद्ध मयनले ९१ बलमा ६२ रन बनाए । मयन क्रिजमा हुँदासम्म नेपाल श्रीलंकालाई स्तब्ध बनाउन सक्ने अवस्थामा थियो । तर उनी आउट भएसँगै श्रीलंका खेलमा हावी भयो । बंगलादेश र अफगानिस्तानविरुद्ध भने मयंकको ब्याट चलेन ।

हालै आयोजना भएको नेपाल प्रिमियर लिग (एनपीएल) मा मयनले जनकपुर बोल्ट्सबाट खेलेका थिए । सो प्रतियोगिताको अक्सनमा उनी अनसोल्ड रहे । तर प्रतियोगिताकै क्रममा एक स्थानीय खेलाडी घाइते भएपछि जनकपुर बोल्ट्सले मयनलाई अनुबन्धित गरेको थियो । उनले जनकपुरका पछिल्ला दुई खेल मात्रै खेल्न पाए । यद्यपि, दुवै खेल सर्वाधिक महत्वपूर्ण थिए ।

एनपीएलको दोस्रो क्वालिफायरमा कर्णाली एक्सविरुद्ध मयनले पहिलो मौका पाए । सो म्याचमा उनलाई सातौं नम्बरमा ब्याटिङ गर्न पठाइएको थियो । भाग्यवस मयनले जिमी निसमसँगै ब्याटिङ पाए । ११९ रनको सामान्य लक्ष्य पछ्याएको जनकपुरले ५८ रनमा पाँच विकेट गुमाएको संवेदनशील स्थितिमा मयन ब्याटिङमा उत्रिएका थिए । सो खेलमा उनले १८ बलमा १४ रन बनाएर अन्तिम ओभरमा रनआउट भए । उनले बनाएको रन धेरै नभए पनि खेलको स्थितिमा जनकपुरलाई जिताउन निकै महत्वपूर्ण सावित भएको थियो ।

सुदूरपश्चिम रोयल्सविरुद्धको फाइनलमा पनि मयन प्लेइङ ११ मा अटाए । सो म्याचमा उनी क्रिजमा आउँदासम्म जनकपुर जितको सन्निकट पुगिसकेको थियो । भाग्यवस विजयी रन हान्ने मौका मयनलाई प्राप्त भयो ।

एनपीएलमा दुई मात्र म्याच खेल्न पाएका मयनले आफ्नो वास्तविक क्षमता जय ट्रफीमा देखाउन पाएका हुन् । एनपीएलजस्तो हाइप नभए पनि यो प्रतियोगिता उनीजस्ता उदियमान प्रतिभाहरुका लागि निकै महत्वपूर्ण छ । एक वा दुई खेलमा राम्रो प्रदर्शन गरेकै आधारमा उनी राष्ट्रिय टीममा परिहाल्न नसक्लान् । तर, राष्ट्रिय टीम चयनकर्ताहरुले भविष्यका सम्भावित ओपनरका रुपमा उनलाई अवश्य पनि सोच्ने छन् ।

अहिले ओपनिङ गर्दै आएका कुशल भुर्तेल, आसिफ शेख र अनिल साहमध्ये कुनै पनि खेलाडीको सबैभन्दा पहिलो विकल्पका रूपमा मयनले आफूलाई उभ्याएका छन् भन्दा फरक नपर्ला । १८ वर्षिय मयनसँग आफूलाई निखार्नका लागि प्रशस्त समय पनि छ ।