डोटीमा ड्युटीमा रहेका प्रहरी सहायक हवल्दारको मृत्यु

डोटी । डोटीको इलाका प्रहरी कार्यालय बीपीनगरमा कार्यरत प्रहरी सहायक हवल्दारको ड्युटीमा रहेकै अवस्थामा मृत्यु भएको छ ।

डडेल्धुराको भागेश्वर गाउँपालिका- ५ घर भएका सहायक हवल्दार बहादुरसिंह पालीको एक्कासि मृत्यु भएको जिल्ला प्रहरी कार्यालय डोटीले जनाएको छ ।

उनी बुधबार बिहान ३ देखि ६ बजेसम्म कार्यालयको ड्युटीमा थिए । ड्युटीमै भएको बेला एक्कासि बेहोस भएपछि उपचारको लागि तत्काल स्थानीय बीपीनगर पोलिक्लिनकमा पुर्‍याइएको थियो ।

पोलिक्लिनिकमा सामान्य चेकजाँचपश्चात थप उपचारको लागि बिहान ४ बजे सेती प्रादेशिक अस्पताल धनगढी रिफर गरिएको थियो । सेती प्रादेशिक अस्पताल धनगढी कैलालीमा साढे ६ बजेतिर पुर्‍याएको र ६ बजेर ४० मिनेटमा उनलाई डाक्टरले मृत घोषणा गरेको डोटी प्रहरीले जनाएको छ ।