महामारीमा हिंसा तत्काल सम्बोधन गर्न प्रहरीले गर्‍यो गुनासो सुन्ने व्यवस्था

काठमाडौं । नेपाल प्रहरीले कोभिड-१९ को महामारीको समयमा महिला, बालबालिका, जेष्ठ नागरिक वा जोखिमपूर्ण अवस्थाका जो कोही विरुद्ध हुनसक्ने घरेलु, यौनजन्य वा अन्य लैंगिक हिंसालाई तत्काल सम्बोधन गर्ने जनाएको छ । प्रहरी प्रधान कार्यालय कार्य एवं अपराध अनुसन्धान विभाग महिला, बालबालिका तथा जेष्ठ नागरिक सेवा निर्देशनालयले हिंसालाई तत्काल सम्बोधन गर्न गुनासो सुन्ने व्यवस्था समेत गरेको जनाएको हो ।

‘कृपया हिंसा सहेर वा हेरेर नबसौं, बेलैमा उजुरी गरौँ । यो संकटको समयमा हामी तपाईसँगै छौँ ।’ भन्दै लैंगिक हिंसा सम्बन्धी गुनासोको लागि टोलफ्री १०० र बालबालिका सम्बन्धी १०४ नम्बरमा सम्पर्क गर्न सकिने निर्देशनालयले जनाएको हो ।

विश्वव्यापी रुपमा फैलिएको नयाँ भेरिएन्ट सहितको कोभिड-१९ को दोस्रो लहरले पुनः निम्त्याएको जोखिमपूर्ण परिस्थितिमा हिंसाका घटना बढ्न सक्ने सम्भावनालाई मध्येनजर गर्दै सचेत रहन निर्देशनालयले सूचना जारी गर्दै सर्वसाधारणमा सचेत हुन आग्रह समेत गरेको छ ।