विश्वकप खेल्ने टोलीलाई बिदाई गर्दै पारसले भने- प्रतियोगितामा क्षमताअनुसारको खेल देखाउनु होला (भिडिओ)

काठमाडौं । नेपाल क्रिकेट संघ क्यानका सचिव पारस खड्काले यू-१९ महिला विश्वकप क्रिकेट प्रतियोगितामा क्षमताअनुसारको खेल देखाउन आग्रह गरेका छन् । विश्वकप खेल्न जाने टोलीलाई बिदाई कार्यक्रममा सचिव खड्काले विश्वकपमा हुने गतिविधिले नेपाली क्रिकेटको पहिचान झल्काउने बताएका हुन् ।

‘नेपाली क्रिकेटलाई विश्वले नै हेरिराखेको अवस्थामा यहाँहरूले अन द फिल्ड र अफ द फिल्ड गरेको सम्पूर्ण गतिविधि नेपाली क्रिकेटको चिनो पहिचानलाई झल्काउने छ । त्यसैले प्रतियोगितामा क्षमताअनुसारको खेल देखाउनुहोला । त्यसको लागि यहाँहरुलाई क्रिकेटको संघको तर्फबाट शुभकामना छ,’ पारसले भने ।

सचिव खड्काले क्रिकेट संघको तर्फबाट धेरै प्रेसर नभएको उल्लेख गरे ।

उनले भने, ‘यो प्रतियोगितामा यहाँहरू सबैजनालाई हाम्रोतर्फबाट क्रिकेट संघको तर्फबाट धेरै प्रेसर छैन । पहिलो पटक खेल्दै हुनुहुन्छ । राम्रो वातावरणमा हुर्केका महिला क्रिकेटमा नेपाल क्रिकेट संघले चाहेर पनि दिन नसक्दा पनि विश्वकपमा सहभागिता जनाउँदै हुनुहुन्छ । विश्वकप भन्नासाथ सम्पूर्ण क्रिकेटिङ राष्ट्रहरू हुनेछन् ।’

यो प्रतियोगिताले आगामी दिनमा नेपाली क्रिकेटलाई अझै बलियो बनाउन सहयोग पुग्ने उनको विश्वास छ ।

‘हामीले सन् २०२७ मा सहआयोजक भएर विश्वकप आयोजना गर्दैछौं । त्यसैले यो प्रतियोगिता नेपाली महिला क्रिकेटका लागी महत्वपूर्ण हुनेछ । किनभन्दा खेरि नेपालको सिनियर महिला टिम र अन्डर १९ टिमको जुन कम्बीनेशन देखिएको छ,’ उनले भने, ‘यसले आगामी दिनमा नेपाली क्रिकेटलाई अझै बलियो बनाउन एकदमै महत्वपूर्ण भूमिका खेल्नेछ ।’