विश्वकपमा केही राम्रो छाप छोड्नेछौं : कप्तान पूजा महत्तो (भिडिओ)

काठमाडौं । यु-१९ महिला विश्वकप क्रिकेट खेल्ने नेपाली टोलीको कप्तान पूजा महतोले विश्वकपमा राम्रो छाप छोड्ने बताएकी छन् । नेपाल क्रिकेट संघ क्यानले आयोजना गरेको बिदाई कार्यक्रममा कप्तान पूजाले विश्वकपमा नेपालको छाप छोड्ने बताएका हुन् ।

‘राम्रो क्रिकेट खेल्नेछौं । किनकि राम्रो क्रिकेट खेलेपछि जे पनि हुन सक्छ । हामीले यो टुर्नामेन्टहरुमा सिकेका छौं । मलाई पुरै विश्वास छ । मेरो टिम विश्वकपमा केही राम्रो छाप छोड्नेछौं’, उनले भनिन् ।

उनले महिला क्रिकेटमा नयाँ इतिहास बनाउँदै आएको बताइन् । विश्वकपमा पनि नयाँ इतिहास बनाउने उनको विश्वास छ । उनले भनिन्, ‘सुरुदेखि नै हामीले महिला क्रिकेटमा नयाँ इतिहास बनाइराखेका छौं । विश्वकप छनोट भयौं । एसिया कपमा पाकिस्तानलाई जित्यौं । हाम्रो गोल धेरै नै सेट छ । विश्वकपमा पनि एउटा नयाँ इतिहास बनाउने छौं ।’

महिला क्रिकेटमा नेपालले पहिलो पटक विश्वकप खेल्न लागेको हो । मलेसियामा हुने प्रतियोगिताका लागि नेपाली टोली भोलि त्यसतर्फ प्रस्थान गर्नेछ ।