मकवानपुर उद्योग वाणिज्य संघमा रानाभाटको नेतृत्व

हेटौँडा । मकवानपुर उद्योग वाणिज्य संघको अध्यक्षमा प्रमोद सिंह रानाभाट विजयी भएका छन् ।

शनिवार सम्पन्न निर्वाचनको आइतबार बिहान घोषणा भएको मत परिणाम अनुसार रानाभाट १ हजार १४ मतसहित अध्यक्ष पदमा निर्वाचित भएका हुन् । उनका प्रतिस्पर्धी अनिल अग्रवालले ७६५ मत पाए ।

यसै गरी, महासचिवमा प्रतिमा श्रेष्ठ १ हजार १२ मतसहित विजयी भएकी छन् । उनका प्रतिस्पर्धी विकेशलाल श्रेष्ठले ७१३ मत प्राप्त गरे ।

यसै गरी, वाणिज्यतर्फ उपाध्यक्षमा राजु अधिकारी विजयी भएका छन् ।

अधिकारी ५९९ मतसहित विजयी हुँदा उनका प्रतिस्पर्धी रामप्रसाद न्यौपानेले ४८४ मत पाए । उद्योगतर्फको उपाध्यक्षमा दीपक उप्रेती विजयी भएका छन् । उनी २७२ मतसहित विजयी हुँदा उनका प्रतिस्पर्धी रवीन्द्रप्रसाद घिमिरेले २४० मत प्राप्त गरे ।

यस्तै, एसोसिएटतर्फको उपाध्यक्षमा उज्ज्वल चौलागाई ४८ मतसहित विजयी हुँदा उनका प्रतिस्पर्धी विष्णु खनालले ३३ मत पाए ।

संघको कोषाध्यक्षमा तेजराज अधिकारी ९१७ मतसहित विजयी हुँदा उनका प्रतिस्पर्धी कृष्ण कर्माचार्यले ८ सय १ मत पाए । सहकोषाध्यक्षमा निलम वैद्य विजयी भएकी छन् । उनी ९०१ मतसहित निर्वाचित हुँदा उनका प्रतिस्पर्धी राधिका सामरी पाण्डेले ७८१ मत पाइन् ।