उपेन्द्रलाई समाजवादी मोर्चामा फर्काउने प्रयास, प्रकाण्ड भन्छन्- छलफल सकारात्मक छ

काठमाडौं । नेकपाका प्रवक्ता खड्गबहादुर विश्वकर्मा प्रकाण्डले समाजवादी मोर्चामा सामेल हुन जसपा नेपाल सकारात्मक रहेको बताएका छन् ।

नेकपा एकीकृत समाजवादीको केन्द्रीय कार्यालयमा आलोकनगरमा बसेको बैठकपछि सञ्चारकर्मीहरुसँग कुरा गर्दै विश्वकर्माले मोर्चामा सहभागी हुन जसपा नेपालका अध्यक्ष उपेन्द्र यादव सकारात्मक रहेको बताए ।

उनले भने, ‘उहाँले तत्काल सहभागी हुन नसक्ने भन्नुभएको छ, तर छलफल सकारात्मक रुपमा अघि बढेको छ ।’

कांग्रेस नेतृत्वको गठबन्धनमा हुँदा प्रचण्डले सरकार टिकाउने अस्त्रका रूपमा चार दललाई समेटेर मोर्चा गठन गरेका थिए ।
प्रचण्ड सरकारमै हुँदा उपेन्द्र यादव नेतृत्वको जसपा नेपाल विभाजित भएपछि सो दल मोर्चाबाट बाहिरिएको थियो ।

प्रचण्डकै कारणले आफ्नो दल विभाजित भएको उपेन्द्रको बुझाइ छ । यद्यपि प्रचण्ड-माधवले उपेन्द्रलाई मोर्चामा फेरि जोड्ने प्रयास जारी राखेका छन् ।