गठबन्धनको स्पिरिटअनुसार काम गर्न आफ्ना मन्त्रीहरूलाई कांग्रेस नेताको निर्देशन

काठमाडौं । नेपाली कांग्रेसको संसदीय दल कार्यसमिति र मन्त्रीहरूको संयुक्त बैठक अहिले बसिरहेको छ ।

सभापति शेरबहादुर देउवाले पार्टीका मन्त्रीहरूलाई छलफलका लागि बूढानीलकण्ठमा डाकेका थिए । बैठकमा मन्त्रीहरूले आ-आफ्नो मन्त्रालयले गरेका कामको ब्रिफिङ गरेका छन् ।

अहिलेसम्म ३ वटा मन्त्रालयको ब्रिफिङ सकिएको युवा तथा खेलकुदमन्त्री तेजुलाल चौधरीले बताए ।

उनका अनुसार नेतृत्वले सरकारका काम कारवाही प्रभावकारी बनाउन गर्नुपर्ने कामको योजना र रणनीतिबारे निर्देशन दिएको छ ।

‘अब के-के काम गर्ने, कसरी प्रभावकारीरूपमा अगाडि जाने । झण्डै २ तिहाइको गठबन्धन सरकारको स्पिरिटअनुसार जनतालाई डेलिभरि दिनुपर्ने कुराहरू दिनुहोस् भनेर उहाँहरूले सुरूमा भन्नुभयो’, मन्त्री चौधरीले भने ।

‘सोचेअनुसार द्रुत गतिमा काम गर्न नसकेको भन्दै केही साथीहरूले समस्या पनि सुनाउनु भएको छ । नेताहरूले मिलेर त्यसलाई समाधान गर्ने आश्वासन दिनुभयो, उनले थपे ।

ओली सरकारमा कांग्रेसबाट २ राज्यमन्त्रीसहित १२ मन्त्रीको प्रतिनिधित्व छ ।

दलका कार्यसमितिमा रहेका महामन्त्रीद्वय गगन थापा र विश्वप्रकाश शर्मासहित राष्ट्रियसभा संसदीय दलका नेता कृष्णप्रसाद सिटौला, प्रमुख सचेतक श्यामकुमार घिमिरे, सचेतक सुशीला थिङ सहभागी छन् ।