राइड सेयरिङ एप ‘सजिलो’मा जोडिए क्याप्टेन विजय लामा

काठमाडौं । क्याप्टेन विजय लामा राइड सेयरिङ एप ‘सजिलो’मा जोडिएका छन् । सोमबार पत्रकार सम्मेलन गर्दै सजिलो नेपाली राइड–सेयरिङ एपका सिइओ अमिर लामाले सह–संस्थापककोरुपमा क्याप्टेन लामा ‘सजिलो’मा भित्रिएको जानकारी दिएका हुन् ।

सजिलो राइड २०८१ वैशाख १ गतेदेखि बजारमा आएको हो । चार वर्ष बजारको अध्ययन गरिसकेपछि हामी नेपाली बजारमा आएकोले यो राइड शेयरिङ एप अन्य भन्दा सुरक्षित रहेको उनले दाबी गरे ।   खाली सवारी कुदाई रहनु भन्दा जो काेहिले पनि राइड शेयररिङ मार्फत काम गर्ने वातावरण बनाउने सजिलोले भूमिका निर्वाह गर्ने उनले बताए ।

हाल कमिसन बिना नै सञ्चालन गरिरहेको सजिलोले अब भने कमिसन लिने भएको छ । सीईओ लामाका अनुसार फागुन १ गतेदेखि कमिसन लिने भएको छ । बाइकमा १० प्रतिशत, क्यापमा ५ प्रतिशत र हात्ती गाडीलाई ५ प्रतिशत कमिसन लिने तयारी रहेको छ । उक्त कमिसन बापतको १० प्रतिशत कोषमा राख्ने समेत तयारी भइरहेको छ । सजिलोले आगामी दिनमा फुड, पार्सल डेलिभरीको सेवा दिने तयारी गरिरहेको छ । यस्तो सेवा ६ महिनाभित्र सञ्चालन गर्ने उनले जानकारी दिए ।

अब ‘सजिलो’ले नयाँ उचाइमा पुर्‍याउने समेत उनले प्रतिबद्धता जनाए ।

सह–संस्थापकको रूपमा सजिलोमा भित्रिएका क्याप्टेन लामाले अब नेपालीहरूले नेपालको राइड शेयररिङ एपलाई साथ सहयोग गर्नुपर्ने उनले आग्रह गरे । लामाले भने, ‘यसमा विशुद्ध नेपालीको लगानी छ । यो नेपाली कम्पनी हो । यसलाई नेपालीहरूले नै साथ सहयोग गर्नु पर्छ । यहाँहरूको सहयोगले नेपाली कम्पनीले नयाँ उचाइ चुम्नेछ ।’

भोलीका दिनमा हामी अरूमा निर्भर नभएर आफ्नै राइड सेयरिङ सजिलोमा भर पर्ने पर्ने उनले बताए । सजिलोलाई नेपालीहरूले आफ्नो मान्न आग्रह गर्दै उनले भने, ‘सजिलो तपाइ हाम्रो हो । हामीले नै यसलाई माथि लैजाने हो । हामी नेपालीहरू सधैँ एक अर्काका लागि साथ सहयोग गर्नु पर्छ । र, गर्नुहुन्छ भन्ने अपेक्षा छ ।’

त्यस्तै, को– फाउन्डर दिवाकर खनालले अहिले काठमाडौं उपत्यकामा मात्रै सेवा दिइरहेको सजिलोले आगामी दिनमा देशका मुख्य–मुख्य सहरहरूमा सेवा विस्तार गर्ने तयारी गरिरहेको जानकारी दिए ।

‘सजिलो माध्यमबाट सहज यातायात सेवा दिन खोजिरहेका छौँ । सजिलो राइडलाई नयाँ उचाइमा पुर्‍याउने प्रयत्न गरिरहेका छौँ । छिट्टै नै देशभरका मुख्य–मुख्य सहरहरूमा सेवा विस्तार गर्ने योजनासहित अगाडी बढेका छौँ ।’