प्रचण्डलाई विश्वप्रकाशको प्रश्न- कांग्रेसले तपाईंलाई प्रधानमन्त्री बनाउँदा संवैधानिक हुने, ओलीलाई बनाउँदा असंवैधानिक ?

भ्रष्टाचार, शिक्षा, अख्तियार, कर्मचारी विधेयक अहिलेको संसदबाट टुग्याएर अघि बढ्नुपर्छ । दोहोरो मापदण्डको दायरा पनि भत्काउनुपर्छ । बर्तमान सरकार असंवैधानिक तर यस अघिको सरकार कसरी संवैधानिक ? काँग्रेस र माओवादी मिल्दा प्राकृतिक अहिले एमाले काँग्रेस मिल्दा कसरी अप्राकृतिक ? यो परिस्थितिको आवश्यकता हो । हामीले अहिलेको सरकार प्राकृतिक भएको भनेर दाबा गरिरहेका छैनौ । के संवैधानिक पनि छैन र ?

संविधानको व्यवस्थाअनुसार प्रचण्ड प्रधानमन्त्री बन्दा संवैधानिक अनि त्यसै संवैधानिक व्यवस्थाले केपी शर्मा ओली प्रधानमन्त्री बन्दा कसरी असंवैधानिक ? प्रमुख प्रतिपक्ष दलको नेता ज्यूले अध्यादेश चोर बाटोबाट आयो भन्नुभयो, संविधान अध्ययन नगरेर कसरी बोल्नुभयो भनेर भन्न सकिदैन । काँग्रेसले हिजो अध्यादेशको बिरोध गर्यो अहिले किन गरेन् पनि भन्न थालियो ।

काँग्रेसले विषय र केन्द्रलाई राखेर मात्रै धारणा बनाउँछ । यस अघि संवैधानिक परिषद्को मर्म भत्काउनेगरी आएको अध्यादेशमा बिरोध जनाएको हो । प्रतिपक्षमा हुदाँ पनि सघाएको सम्झना छ । अध्यादेश आफुले ल्याउदाँ मुल बाटो तर अरुले ल्याउँदा चाहिँ चोर बाटो कसरी ? यसैले आएका अध्यादेश स्वीकृत गरेर जानुपर्छ ।

अघिल्लो सरकारले सामाजिक सञ्जाल निर्देशिका सल्लाह नै नगरेर ल्यायो । अहिलेको सरकारले पनि विधेयक सल्लाह नगरेरै ल्याएको छ । अभिव्यक्ति स्वतन्त्रता हनन हुनेगरी विधेयक पारित गर्ने विषयमा हामी कोहि कसैले स्विकार गर्दैन । अध्यादेश हुदैँमा गलत हुदैँन विधेयक हुदैँमा सही हुँदैन ।

सामाजिक सञ्जाललाई नियमन गरौ नियन्त्रण होइन । जातीय विभेद जस्तो गम्भिर विषय जुन बेला आउँछ, त्यो बेला सामाजिक सञ्जालको प्रस्तोता मात्रै होइन, समाजको कुनै कुनामा बसेको नागरिकलाई पनि राज्यले आवश्यकता अनुसार नियन्त्रणमा ल्याउ । म यो आग्रह गर्न चाहान्छु ।