प्रचण्डले देशलाई अराजकता र पुनः हिंसामा धकेल्न खोजेको राप्रपाको आरोप

काठमाडौं । राष्ट्रिय प्रजातन्त्र पार्टी (राप्रपा) का महामन्त्री एवं आन्दोलन परिचालन समितिका संयोजक डा. धवलशमशेर राणाले माओवादी अध्यक्ष पुष्पकमल दाहाल प्रचण्डले देशमा अराजकता र पुनः हिंसामा धकेल्न खोजेको आरोप लगाएका छन् ।

पूर्वराजा ज्ञानेन्द्र शाहलाई प्रचण्डले भाइमारा, मूर्ति चोर र सुन तस्कर भएको आरोप लगाएपछि महामन्त्री राणाले यस्तो टिप्पणी गरेका हुन् ।

उनले भने, ‘माओवादी अध्यक्ष प्रचण्डको हालैको अभिव्यक्ति हेर्दा देशमा अराजकता र पुनः देशलाई हिंसामा धकेल्न खोजेको प्रस्ट हुन्छ । यो परिस्थितिमा सम्पूर्ण देशभक्त र राजभक्तहरुमा यस्ता अराजक गतिविधिबाट प्रभावित नभई संयमतापूर्वक आफ्नो अभियान जारी राख्न अनुरोध छ ।’

हिजो सिन्धुपाल्चोकको मेलम्ची पुगेर प्रचण्डले पूर्वराजा शाहले धेरै चुरीफुरी गरे ठेगान लगाइदिने चेतावनी दिएका थिए । प्रचण्डले भनेका थिए, ‘नेपाली जनताले मूर्तिचोर को हुन्, भाइमारा को हो, आफ्नै वंश मास्नेले अहिले धाक लगाउन मिल्छ ? सुन तस्कर को हो भन्ने बिर्सेका छैनन् । त्यसैले अहिले धेरै चुरीफुरी नगरे हुन्छ ।’