अमेरिकाले थप २० मिलियन डोज खोप अन्तर्राष्ट्रिय समुदायलाई बाँड्ने

वासिङ्टन । अमेरिकाले कोभिड-१९ विरुद्धको थप २० मिलियन डोज खोप अन्तर्राष्ट्रिय समुदायलाई बाँड्ने घोषणा गरेका छन् ।

अमेरिकामै उत्पादन भएका मोर्डन, फाइजर र जोन्सन एन्ड जोन्सनको उक्त परिमाणको खोप बाँड्ने घोषणा राष्ट्रपति जो बाइडेनले गरेका हुन् ।

जुन महिनाको अन्त्यसम्म ती भ्याक्सिनलाई विदेशमा वितरण हुने जनाइएको छ । कुनैपनि मुलुकले अन्तर्राष्ट्रिय समुदायलाई दिएको खोपभन्दा यो पाँचगुणाले बढी हो ।

बाइडेनले यसअघि पनि ६० मिलियन अस्ट्राजेनेका खोप वितरण गर्ने घोषणा गरिसकेका छन् । अमेरिकामा भने अस्ट्राजेनेकाको भ्याक्सिनले प्रयोगको अनुमति प्राप्त गरिसकेको छैन ।

नेपालले पनि अमेरिकाबाट खोप आपूर्तिका लागि परराष्ट्र मन्त्रालयमार्फत पहल गरिरहेको छ । अमेरिकी राजदूत बेरीले पनि नेपाललाई खोप उपलब्ध गराउन पहल गरिरहेको र वासिङ्टनमा खबर दिइसकिएको जनाएका छन् ।

अमेरिकाले अन्तर्राष्ट्रिय समुदायलाई दिने भनेको ८० मिलियन डोज नेपालले प्राप्त गर्ने भन्ने टुंगो लागिसकेको छैन ।