महजोडीको राष्ट्रपतिसँग आग्रह: देश बन्दैछ तर नेताहरुलाई सुधार्न घचघच्याउनुपर्‍यो

काठमाडौं । राष्ट्रपति रामचन्द्र पौडेलसँग वरिष्ठ कलाकारद्वय मदनकृष्ण श्रेष्ठ र हरिवंश आचार्यले भेटेर संघीय लोकतान्त्रिक गणतन्त्रलाई सुदृढ गराउन सुशासन, चुस्त सेवाप्रवाह र भ्रष्टाचार अन्त्यका लागि अभिभावकका हैसियतले राजनीतिक दलका नेताहरुलाई घचघच्याउन आग्रह गरेका छन् ।

भेटपछि मदनकृष्ण श्रेष्ठ र हरिवंश आचार्यले संघीय लोकतान्त्रिक गणतन्त्रप्रति जनताको विश्वास कायमै रहेको बताए । तर, राजनीतिक दलका नेताहरुको गलत क्रियाकलापप्रति जनताको असन्तुष्टि रहेको हुनाले राजनीतिक नेतृत्वलाई राष्ट्रपतिज्यूले सुधारका लागि घचघच्याउन आफूहरुले सुझाव दिएको जानकारी दिए ।

देश बिग्रेको होइन, बनिरहेको छ तर सुशासन पटक्कै भएन, विचौलीयाले जनतालाई मारमा पारे । राष्ट्रपतिज्यूले यसमा सम्बद्ध सबैलाई घचघच्याइ दिनुपरयो’, आफूहरुले राष्ट्रपतिसँग गरेको आग्रह उदधृत गर्दै उनीहरुले भने ।

उनीहरुले आफूहरुले राष्ट्रपतिसँग अरुलाई कसैलाई मन पराएका होइनन्, लोकतन्त्र भित्रै सुधार हुनुपरयो भन्ने जनताको असन्तुष्टि हो, त्यसैले यसभित्रै सुधारका लागि पहल गर्न आवश्यक छ भनेको जानकारी दिए ।