दश अमेरिकी कम्पनीद्वारा सहायता प्रदान, काठमाडौं आइपुग्यो ८६० थान अक्सिजन कन्सनट्रेटर (तस्विरहरु)

काठमाडौं । कोभिड-१९ महामारीविरुद्ध दशभन्दा बढी विश्वचर्चित अमेरिकी कम्पनीले नेपाललाई स्वास्थ्य सहायता उपलब्ध गराएका छन् ।

ती संस्थाले उपलब्ध गराएको ३५ टन स्वास्थ्य सामग्री लिएर डाइरेक्ट-रिलिफको चार्टर्ड जहाज शुक्रबार त्रिभुवन अन्तर्राष्ट्रिय विमानस्थलमा अवतरण गर्‍यो ।

सिकागोबाट काठमाडौंसम्म ल्याइएका ती स्वास्थ्य सामाग्रीमा ८६० थान अक्सिजन कन्सनट्रेटर र पीपीई समावेश छन् । उपलब्ध मेडिकल सामग्रीलाई सिद्धस्थली ग्रामिण अस्पतालमा अक्सिजन प्लान्ट स्थापना गर्न समेत प्रयोग गरिने भएको छ ।

विश्वचर्चित अमेरिकी कम्पनीहरु फाइजर, ३एम, एबभाइ, ब्याक्स्टर, बीडी, हिक्मा फार्मास्युटिकल्स, टाकेडा फार्मास्युटिकल्स, तेभा फार्मास्युटिकल्स, टाइफाइ ह्युमानिटेरियन, भायट्रिज र अन्य कम्पनीले सहायता उपलब्ध गराएका हुन् ।

डाइरेक्ट रिलिफका अध्यक्ष तथा सीइओ थोमस टीगेले नेपाली साझेदारसँग मिलेर यस्तो संकटको बेला काम गर्न पाउँदा खुशि लागेको बताएका छन् । ल्याइएका सामग्रीलाई सीसीएमसी, धुलिखेल अस्पताल, वान हार्ट वल्र्डवाइड लगायतलाई प्रदान गरिने भएको छ ।

नेपालमा सामग्री ल्याएर आएको उक्त जहाजले भारतमा समेत स्वास्थ्य सामग्री ल्याएको थियो । अमेरिकास्थिती नेपाली दूतावासले विज्ञप्ती जारी गर्दै सहायताका लागि धन्यवाद दिएको छ ।

तस्विर : प्राञ्जल शर्मा