ब्रेन्टफोर्ड पहिलोपल्ट प्रिमियर लिगमा

एजेन्सी । च्याम्पियनसिप प्लेअफ फाइनलमा स्वान्सी सिटीलाई पराजित गरी ब्रेन्टफोर्ड क्लब पहिलोपल्ट इंग्ल्याण्डको शीर्ष डिभिजनको प्रतियोगिता प्रिमियर लिगमा बढुवा भएको छ ।

इभान टोनीले दशौं मिनेटमै पेनाल्टीमा गोल गरी अग्रता दिलाएकोमा २० औं मिनेटमा इमिलियोनो मार्कोदेसले सानदार गोल थपे । ६५ औं मिनेटमा स्वान्सी १० खेलाडीमा समेटिएको थियो । सन् १९४६÷४७ पछि ब्रेन्टफोर्डले पहिलोपल्ट शीर्ष डिभिजनमा प्रतिस्पर्धा गर्ने भएको छ ।

‘साँच्चिकै म धेरै भावुक भएँ,’ ब्रेन्टफोर्डका प्रशिक्षक थोमस फ्र्यांकले भने, ‘हामीले जुन अवस्थाबाट यो सफलता हासिल गर्‍यौं । मेरोमात्र होइन अधिकांश खेलाडी र अन्य अफिसियलले पनि आफ्नो आँसु थाम्न सकेनन् ।’

ब्रेन्टफोर्ड अघिल्लो वर्षको प्लेअफ फाइनलमा फुलह्यामसँग २–१ ले पराजित भएको थियो । प्लेअफको दशौं प्रयासमा उसले सफलता हासिल गरेको हो । ब्रेन्टफोर्ड प्रिमियर लिग खेल्ने ५० औं क्लबसमेत बनेको छ ।

स्वान्सीका लागि भने लगातार दुई सिजन निराशाजनक रह्यो । स्वान्सी अघिल्लो सिजन प्लेअफ सेमिफाइनलमा पराजित भएको थियो ।