विराटनगरबाट कांग्रेस नेताले भनेः संसद विघटन हुनुमा ओली मात्रै दोषी छैनन्

विराटनगर । नेपाली कांग्रेसका नेताहरूले संसद विघटन हुनुमा प्रधानमन्त्री ओली मात्रै दोषी नभएको बताएका छन् । विराटनगरको विरोधसभालाई सम्बोधन गर्दै कांग्रेस केन्द्रीय डाक्टर शेखर कोइराला र नेपाली कांग्रेस प्रदेश १ का मुख्य सचेतक केदार कार्कीले प्रधानमन्त्रीको असंवैधानिक कदममा प्रचण्ड र माधव नेपालको पनि हात रहेको बताएका हुन् ।

सभालाई सम्बोधन गर्दै कोइरालाले सर्वोच्च अदालतले निर्वाचनकै पक्षमा फैसला गरेपनि निर्वाचन हुन नसक्ने बताए । उनले भने, ‘सर्वोच्चबाट निर्वाचनको पक्षमा फैसला आए पनि निर्धारित मितिमा चुनाव हुँदैन । त्यसैले काङ्ग्रेसको निरन्तर खबरदारी जरुरी छ ।’

विराटनगरको महेन्द्र चोकमा भएको सभामा सम्बोधन गर्ने काङ्ग्रेस प्रदेश १ का प्रमुख सचेतक केदार कार्कीले चुनाव हारेका नारायणकाजी र वामदेवलाई राष्ट्रियसभामा लाने प्रचण्ड र माधव नेपालनै भएको भन्दै उनीहरुको पनि काङ्ग्रेसले विरोध गर्नुपर्ने बताए।