गायक दीप श्रेष्ठ डिस्चार्ज, चिकित्सक र नर्सले अस्पतालमा गरे फेयरवेल

काठमाडौं । बरिष्ठ गायक दीप श्रेष्ठ कोरोनाभाइरस संक्रमणमुक्त भएका छन् । राजधानीको ह्याम्स अस्पतालमा उपचार गराइरहेका उनी १६ दिनपछि डिस्चार्ज भएका हुन् । उनलाई अस्पतालका डाक्टर र नर्सले शुभेच्छासहित अस्पतालबाट फेयरवेल गरे ।

संक्रमण पुष्टि भएको केही दिनपछि अक्सिजनमा मात्र कम भएपछि उनी ह्याम्स अस्पताल भर्ना भएका थिए । दुई साता आइसीयूमा राखेर उनलाई उपचार गरिएको थियो । स्वास्थ्यमा सुधार आएपछि उनलाई डिस्चार्ज गरिएको जानकारी द भ्वाइस अफ नेपालका निर्देशक लक्ष्मण पौडेलले जानकारी दिए ।

अब घरमै बस्न मिल्ने भएपछि अस्पतालले दिउँसो डिस्चार्ज गरेको उनले जनाए । डिस्चार्ज हुनुअघि उनको पुनः कोरोना परीक्षण गरिएको जनाइएको छ । बरिष्ठ गायक श्रेष्ठ गायन रियालिटी सो भ्वाइस अफ नेपालका निर्णायक मध्येका एक हुन् ।