लुम्बिनीको बजेटमा कृषिलाई प्राथमिकता

रुपन्देही । प्रदेशका उत्कृष्ट कृषक एवं कृषि सहकारीलाई पुरस्कारलाई निरन्तरतता दिने भएको छ । ‘म किसान प्रदेशको शान’ नाराको साथमा मुख्यन्त्री उत्कृष्ट कृषक एवं सहकारी नामक पुरस्कार प्रदान गरिने भएको हो ।

त्यस्तै सरकारले किसानका लागि कृषि प्राविधिक कार्यक्रम पनि ल्याएको छ । प्रदेश सरकारको बजेट सार्वजनिक गर्दै लुम्बिनी प्रदेशका आर्थिक मामिला तथा योजना मन्त्री बैजनाथ चौधरीले प्रदेशका सबै पालिकामा कृषि प्राविधिक राख्ने घोषणा गरेका हुन् ।

दुधमा आत्मनिर्भर बनाउन प्रदेशले ८ करोड बिनियोजन गरेको छ । यसले दुग्ध उत्पादनको बिविधीकरण गरि छुर्पी एवं दुग्ध उद्योग सञ्चालन गर्न बजेट बिनियोजन गरिएको हो ।त्यस्तै स्मार्ट कृषि गाउँ कार्यक्रमका लागि ३५ करोड बजेट बिनियोजन भएको छ ।

यसैगरी लुम्बिनी सरकारले प्रदेशका ४ स्थानमा विद्युतीय बसको लागि चार्जिङ स्टेसन स्थापना गर्ने जनाएको छ ।
बुटवल भैरहवा र कोहलपुर नेपालगञ्जमा विद्युतिय बस चलाउन सम्भाव्यता अध्ययन भइसकेको आर्थिक मामिला तथा योजना मन्त्री बैजनाथ चौधरीले बताए । उनले दुवै रुटको ४ स्थानमा चार्जिङ स्टेसन बनाउने घोषणा गरेका हुन् ।

लुम्बिनी प्रदेश सरकारले अदक्ष युवाहरुमा सीप वृद्धि गर्ने योजनासहित सीप प्रतिष्ठान स्थापना गर्ने भएको छ ।