नेपाल-अमेरिका फिल्म फेस्टिभलमा ‘जुलुङ्गो’ सर्वोत्कृष्ट (सूचीसहित)

काठमाडौं । भाइरस महामारीको कारण भर्चुअल रुपमा आयोजित यसवर्षको नेपाल-अमेरिका फिल्म फेस्टिभलको संस्करण सोमबार सम्पन्न भएको छ ।

फेस्टिभलमा राजेशप्रसाद खत्रीले निर्देशन गरेको जुलुङ्गो (स्केरक्रो)ले लघु फिल्मतर्फको उत्कृष्ट जुरी अवार्ड जितेको छ । लघु फिल्मतर्फ कै प्याट हेवुड र जेमिल मेगिनिसको फिल्म चलचित्र ‘ग्रामर्सी’ले पनि अवार्ड हात पारेको छ ।

महोत्सवमा रामदास कदावल्लुरको फिल्म ‘मन्नु : स्प्राउट्स अफ एन्डुरेन्स’ ले स्पेसल जुरी मेन्सन अवार्ड पाएको छ । जितपछि खुशि व्यक्त गर्दै निर्देशक कदावल्लुरले फिल्ममार्फत मानवताको बेलामा बोल्ने बेला आएको बताए ।

त्यस्तै सोफिया अलावीको फिल्म ‘सो ह्वाट इफ गोट्स डाइ’ ले पनि स्पेसल जुरी मेन्सन अवार्ड प्राप्त गरेको छ ।

उत्कृष्ट एक्सपेरिमेन्टलको जुरी अवार्ड लोरी फेल्करकको ‘स्पोटेनस’ ले प्राप्त गरेको छ । त्यस्तै उत्कृष्ट फिचर फिल्मको जुरी अवार्ड ‘मदर आइएम सफोकेटिङ, दिस इज माइ लास्ट फिल्म अबाउट यू’ ले हात पारेको छ ।

लेमोह्याङ जेरिमाया मोसेजद्धारा निर्देशित यही फिल्मले महोत्सवमा ग्रान्ड जुरी अवार्ड प्राप्त जितेको छ ।

नेपाल–अमेरिका फिल्म सोसाइटीले आयोजना गरेको महोत्सवमा नेपाललगायत १४ देशका ३० वटा फिल्म प्रदर्शन भएका थिए । चार दिन चलेको फेस्टिभल अवधिभर निःशुल्क फिल्म प्रदर्शन गरिएको थियो ।

फेस्टिभलको निर्णायक मण्डलमा रम्यता लिम्बु, अमेरिकाबाट सपना शाक्य, रिबेका बिसमान्ते, निना स्ट्रिच्क, रिता मेहर र पोर्सिया कोब थिए । कोरोना महामारीका कारण २०२० को महोत्सव स्थगित भएता पनि साउथ एसियन फिल्म फेस्टिभलहरुको नेटवर्कमा कोसाफको आयोजना भएको थियो ।

फेस्टिभल निर्देशक पूर्णसिंह बराइलीले जुरी, पत्रकार लगायत सहयोग गर्ने सबैलाई धन्यवाद दिए । अमेरिकाको मेरिल्यान्डमा वर्षेनी आयोजना हुने फेस्टिभल यसपटक भर्चुअलरुपमा सम्पन्न भएको हो ।