जसपाका निवर्तमान मन्त्रीहरुलाई ओलीको ढाढस : चिन्ता नलिनुस्, म तपाईंहरुसँगै छु

काठमाडौं । सर्वोच्च अदालतको आदेशले बहिर्गमनमा परेका मन्त्रीहरु साँझ बालुवाटारस्थित प्रधानमन्त्री निवासमा भेला भएका छन् । प्रधानमन्त्री केपी शर्मा ओलीले उनीहरुलाई सर्वोच्चको आदेशबाट धेरै तरंगित नहुन र उत्तेजक प्रतिक्रिया नदिन फकाए ।

बहिर्गमनमा परेका जसपा र एमालेका अधिकांस निवर्तमान मन्त्रीहरु उदासी मुद्रामा प्रधानमन्त्री निवासमा पुगेका थिए । बहालवाला मन्त्रीहरु र एमालेका शिर्ष नेता पनि थिए । प्रधानमन्त्री ओलीले खासगरि जसपाका निवर्तमान मन्त्रीहरुलाई ढाढस दिन खोजेको स्रोतले बतायो ।

‘तपाईंहरुले चिन्ता नलिनुस्, अदालतको आदेश आफैंमा अन्तरविरोधपूर्ण छ,’ ओलीलाई उदृत गर्दै स्रोतल भन्यो, ‘४ मन्त्रीले २१ वटा मन्त्रालय चलाउन सक्दैन भन्ने सबैलाई थाहा छ । यो अन्तरिम आदेश मात्रै भएकाले सर्वोच्चले फैसलामा सच्याउँछ होला । नभए पनि म छु ।’

आफूहरु एउटै डुंगामा भएको ओलीले जसपाका मन्त्रीहरुसँग बताए । प्रतिनिधिसभा विघटन संविधानसम्मत ढंगले नै भएकाले भवियमा राजनीति आफूहरुकै पकडमा आउने विश्वास उनले व्यक्त गरे ।