असोज मसान्तसम्म ३३ प्रतिशत जनसंख्यालाई खोप दिइने, तेस्रो लहरविरुद्धको तयारी सुरु

काठमाडौं । स्वास्थ्य मन्त्रालयले असोज मसान्तसम्म मुलुकको ३३ प्रतिशत जनसंख्यालाई कोरोनाभाइरसविरुद्धको खोप दिइने जनाएको छ ।

नवनियुक्त स्वास्थ्यमन्त्री कृष्णगोपाल श्रेष्ठले पदभार ग्रहण गर्न शुक्रबार दिउँसो मन्त्रालयमा आयोजित कार्यक्रममा स्वास्थ्य सचिव लक्ष्मण अर्यालले सो जानकारी दिएका हुन् ।

सो मितिसम्म खोप दिन सकिए कोभिड-१९ महामारीलाई केही हदसम्म भएपनि नियन्त्रण गर्न सकिने उनले जनाए । ३३ प्रतिशत जनसंख्यालाई खोप लगाउन डेढकरोड डोज खोप आवश्यक पर्ने र १ करोड १० डोज खोप तत्काल अर्डर गरिएको उनले जनाए ।

कोभ्याक्सले २० प्रतिशत जनसंख्यालाई पुग्ने खोप प्रदान गर्नेछ भने बाँकी डोज खोप सरकारले आफै खरिद गर्ने तयारी गरेको छ । खोप खरिदका लागि कूटनीतिक माध्यमलाई अझै सक्रिय तुल्याउन उनको आग्रह छ ।

भाइरसका आगामी लहरबाट जोगिन मन्त्रालयले सोही अनुसार तयारी सुरु गरेको उनले जनाए ।