राहत प्याकेज कागजमा मात्र सीमित, पर्यटन व्यवसायी मारमा

काठमडौं । पर्यटन क्षेत्रलाई जोगाउनका लागि तत्काल दुई\तीन प्रतिशतमा ‘सफ्ट लोन’ को व्यावस्था गर्नुपर्ने पर्यटन व्यवसायीले बताएका छन् ।
बिहीबार भएको पर्यटन बोर्डको स्थापना दिवसमा निजी क्षेत्रको प्रतिनिधित्व गर्दै पर्यटन व्यवसायी दीपक महले सो कुरा बताएका हुन । कोरोना माहामारीका कारण पर्यटन व्यावसाय शून्यमा झरेकाले यसलाई तत्काल पुर्नस्थपना गर्नुपर्ने उनले बताए ।

सरकारले राहात प्याकेज ल्याएपनि त्यसको कार्यन्वयन नहुँदा कागजमा मात्र राहात हेरेर बस्नुपरेको उनको गुनासो थियो । ‘सरकारलाई हामी कर बुझाउँछौ । विदेशी रुपैयाँ आर्जन गर्नमा सवैभन्दा धेरै पर्यटन क्षेत्रको योगदान छ । तर, अफ्ट्यारो पर्दा व्यवसायीलाई बचाउँने काम सरकारको होइन ?,’ उनले रोष प्रकट गरे ।

पर्यटन व्यवसायीले आफूसँग भएको संचित बचतले अहिलेसम्म धानेको र अबका दिन झन विक्राल हुनसक्ने भन्दै यसलाई समयमा नै व्यवस्थापन गर्नुपर्नेमा उनले जोड दिए ।

कार्यक्रममा बोल्दै उनले भने अबको केही वर्ष नेपालको पर्यटनलाई आन्तरिक पर्यटनले धान्ने छ । यसका लागि आन्तरिक पर्यटनलाई जोड दिनु नै अहिलेको विकल्प हो ।

कार्यक्रममा पर्यटन मन्त्री भानुभक्त ढकालले पर्यटन क्षेत्र देशको मेरुदण्ड भएकाले यसको विकासमा लाग्नु पर्ने बताए । आफू छोटो समयका लागि पर्यटन मन्त्री भएर आएको भन्दै यो समयमा राम्रो काम गर्ने बताए ।

कार्यक्रममा बोर्डका सिइओ डा.धनन्जय रेग्मीले लकडाउन पछि बोर्डले के–के काम गर्‍यो त्यसको जानकारी दिएका थिए ।