कोरोनासँगै डेंगुको जोखिम बढेकाले सतर्कता अपनाउन स्वास्थ्य मन्त्रालयको आग्रह

काठमाडौं । कोरोनाभाइरसको जोखिम कायम रहेसँगै लामखुट्टे बाट सर्ने रोग डेंगुको जोखिम पनि बढेको छ । स्वास्थ्य मन्त्रालयले कोभिड-१९ को लक्षणसँग डेंगुको लक्षण मिल्दोजुल्दो हुने भएकाले विज्ञप्ती जारी गर्दै सुरक्षित रहन आग्रह गरेको छ । वर्षायामको बेला डेंगुको जोखिम बढेको भन्दै मन्त्रालयले सतर्कता अपनाउन भनेको हो ।

एक्कासी ज्वरो आउने , खानपान वा अन्य कामकुरामा रुचि नलाग्ने, थकान महसुस हुने, टाउको मांसपेशी तथा जोर्नी दुख्ने, वाकवाकी लाग्ने वा वान्ता हुने जस्ता लक्षण देखा पर्‍यो भने तुरुन्त स्वास्थ्य संस्थामा जान मन्त्रालयले आग्रह गरेको छ । मन्त्रालयले अनुभवका आधारमा जथाभावी औषधी सेवन नगर्न आग्रह गरेको छ ।

मनसुन सुरु भएसँगै वर्षायाममा डेंगु र कोरोनाबाट सुरक्षित रहनको लागि निम्न उपायहरु अपनाउन मन्त्रालयले आग्रह गरेको छ :

• लामखुट्टेको टोकाइबाट बच्न पूर शरीर ढाक्ने कपडा लगाउने र घरबाहिर जाँदा अनिवार्यरुपमा मास्क लगाउने
• घर वरपर प्लास्टिक, सीसा, खपटा, सिडी, चिया खाएर फालिएका कप, नरिवलका बोक्रा आदी भए सफा गर्ने र पानी जम्न नदिने, खाल्डाखुल्डी पुर्ने, खानेपानी वा ढल चुहिएको छ भने तत्काल मर्मत गर्ने
• पानीको नाली, ढल, पोखरीमा हप्ताको दुई दिन डढेको मोबिल वा मट्टितेल छर्कने
• खाली भाँडाकुँडा घोप्ट्याएर राख्ने
• पानीको ट्यांकी पूरै खाली गरेर सफा गरिरहने
• कुलरमा हप्ताको एक वा दुई पटक मट्टितेल हाल्ने
• बेलाबेलामा साबुनपानीले मिचिमिचि हात धुने र भौतिक दूरी कायम गर्ने
• सुत्ने बेला झुलको प्रयोग गर्ने
• परिवारमा कसैलाई यस्ता लक्षण देखापरे तुरुन्तै आइसोलेशनमा बस्ने