संवैधानिक इजलास : ‘आफैं मुद्दा हाल्ने अनि हु आर यू भन्ने ?’

काठमाडौं । वरिष्ठ अधिवक्ता सुशील पन्तले आफैंले मुद्दा दिएको प्रधानमन्त्री र राष्ट्रपतिलाई ‘हु आर यू ?’ भनिएकोमा आपत्ति जनाएका छन् ।

प्रधानमन्त्रीका तर्फबाट प्रतिनिधिसभा विघटनको मुद्दामा बहस गर्दै वरिष्ठ अधिवक्ता पन्तले आफ्नै ‘क्लाइन्ट’ ले विपक्षी बनाएकालाई कानून व्यवसायीले नचिन्नु गलत रहेको बताए । ‘अब यहाँ त हु आर यू रे । तपाईंको क्लाइन्टले विपक्षी बनाएपछि थाहा हुँदैन को हो भनेर ? विपक्षी चाहिँ प्रधानमन्त्री र राष्ट्रपति कार्यालयलाई बनाउने अनि यहाँ आएर हु आर यू भन्ने ?’, पन्तले भने ।

बहसका क्रममा पन्तले संविधानको धारा ७६ को ५ ले राष्ट्रपतिलाई विवेक प्रयोग गर्ने अधिकार दिएकोले राष्ट्रपतिको विवेकविरुद्ध मुद्दा लाग्न नहुने बताए ।

‘राष्ट्रपतिविरुद्ध मुद्दा लाग्छ कि नाइँ ? संविधानले राष्ट्रपतिले गरेको काममा मुद्दा लाग्दैन भनेको छ । मुद्दा लाग्छ भनेपनि राष्ट्रपतिको धारणा एकपटक नसुनी मुद्दा हाल्ने ? के राष्ट्रपतिलाई प्राकृतिक न्यायको सिद्धान्त लागू हुँदैन ?’, पन्तले भने ।

रिट निवेदक पक्षबाट बहस गर्दै यसअघि वरिष्ठ अधिवक्ता शम्भु थापाले राष्ट्रपति र प्रधानमन्त्रीलाई ‘हु आर यू’ भनेका थिए ।