चितवनका महिला संगठनको माग- सुजिता मृत्यु प्रकरण निष्पक्ष छानविन होस्

चितवन । सुजिता भण्डारी मृत्यु प्रकरणको निष्पक्ष छानविन गर्न राजनीतिक दलनिकट चितवनमा महिला संगठनले माग गरेका छन् । संयुक्त विज्ञप्ति जारी गर्दै उनीहरूले निष्पक्ष छानविन, गहिरो र गम्भीर अनुसन्धानमार्फत दोषीलाई कानूनी कठघरामा उभ्याउन सम्बन्धित निकायको ध्यानाकर्षण गराएका छन् ।

नेपाल महिला संघ चितवनका अध्यक्ष पार्वती शाह ठकुरी, अखिल नेपाल महिला संघ (क्रान्तिकारी) केन्द्रीय समितिका अध्यक्ष अम्बिका मुडवरी र जिल्ला अध्यक्ष संगिता भट्टराई, अखिल नेपाल प्रगतिशील महिला संघ केन्द्रीय समितिका वरिष्ठ उपाध्यक्ष भगवती घिमिरे, अखिल नेपाल महिला संघ चितवन अध्यक्ष सुशिला लामिछाने, समाजवादी महिला संघ नेपाल चितवनका सचिव माया पोखरेल, अखिल नेपाल महिला संघ (राष्ट्रिय जनमोर्चा) चितवनका अध्यक्ष सीता आचार्यले यस्ता घटनामा राज्य जिम्मेवार नभए आन्दोलनमा उत्रने चेतावनी दिएका छन् ।

नियन्त्रण र अपहरणमा परको सूचना स्वयमले दिएपछि पनि खोजअनुसन्धानले परिणाम हासिल गर्न नसकेको, जंगलमा शव भेटिनुले गम्भीर आशंका र अनेक प्रश्नहरू उब्जिएको विज्ञप्तिमा उल्लेख छ । असार ११ गते हराएकी राप्ती-३ की सुजिता भण्डारी २० गते जंगलमा मृत फेला परेकी थिइन् ।