नास्टको कार्यक्रममा प्रधानमन्त्री : सिकाए जनै खटिराको उपचार (भिडियो)

काठमाडौं । प्रधानमन्त्री केपी शर्मा ओलीले एकै पुस्तामा विद्धान तयार गर्न नसकिने बताएका छन् ।

नेपाल विज्ञान तथा प्रविधि प्रज्ञा प्रतिष्ठान (नास्ट) ले बालुवाटारमा विहिबार गरेको कार्यक्रमलाई सम्बोधन गर्दै उनले पूर्वजहरूले कयौँ परम्परागत ज्ञान दिएर छोडेकाले त्यसलाई अनुसरण गर्दै अघि बढ्न सकेमात्रै विषय विज्ञता हासिल गर्न सकिने बताएका छन् । मानवीय श्रेष्ठताको सबै भन्दा ठूलो कुरा पूर्खाको ज्ञानलाई स्वीकार गर्दै नयाँ आविश्कार गर्दे जानुपर्नेमा प्रधानमन्त्री जोड दिए ।

उनले भने ‘एक जेनेरेसनमा नै मेहनत गरेर विद्वान हुन सकिँदैन । जेनेरेसन टू जेनेरेसनको मेहनतबाट मात्रै विद्वान हुन सकिन्छ । हामीहरुले पूर्वजको मेमोरि, जेनेटिक मेमोरी, मानिसको सबैभन्दा श्रेष्ठता के हो भने मेमोरि पावर र इन्नोभेटिभ पावर । मेमोरि पावर र इन्नोभेटिभ पावर मिलेको हुन्छ र हामी विकास गर्न सक्छौ । हाम्रो जस्तो देशमा हामीले असाधारण ढंगले काम गर्न सक्छौँ ।’

ओलीले कार्यक्रममा पुराना ज्ञानहरु अत्यन्तै प्रभावकारी भएको भन्दै पानीसराको औषधी कालो तिल भएको भन्दै लगाउने तरिका पनि सुझाएका छन् ।

‘मैले हिजो बेलुका मात्रै एकजना साथीलाई भनेँ, मैले हेर्न त हेरिन, उहाँले जनै खटिरा भन्नुभयो । पानीसराको लक्षण पनि देखिन्थ्यो त्यसमा अनि मैले उहाँलाई एउटा औषधी चाहीँ बताईदिएँ । म आफैलाई पानीसरा भएको थियो । पानीसरा अत्यन्तै पोल्छ । र दुख्छ र घाउ हुन्छ फुटेपछि र त्यो बहुत छिटो फैलिन्छ पनि र हाई फिवरमा लान्छ त्यसले । साधारण औषधी कालो तिल आफैले चपाएर थपकथपक लगाईदियो भने, विमारीले चपाउन पनि आनन्द मान्छ । र चपाउँदै मसिनो पार्दै त्यो लेप लगाईदियो भने । लगाउदा सँगसँगै पोलिरहेको पानीसरा, फोका फोका, त्यो जीलजील गर्ने फोकाहरु समाप्त हुन्छ र विस्तारै त्यो केही घण्टाभित्र सुक्छ । त्यो मैले अरु ठाउँमा पनि प्रयोग गरेर हेरेँ र त्यो अत्यन्तै सफल पनि भयो ।’

प्राय: सार्वजनिक कार्यक्रममा विपक्षीको तीखो आलोचना गर्ने प्रधानमन्त्रीले आज जडिबुटीको उपयोगिता, नयाँ आविष्कार तथा पराम्परागत औषधीको वेलिविस्तार लगाएका छन् ।